top of page

Caso kan TB sa Ciudad nin Naga, naglalangkaw

An Rehiyon Bicol saro sa may halangkaw na caso nin tuberculosis (TB) base sa record kan National Tuberculosis Program (NTP), sa Ciudad nin Naga, si Grace Guevara an Medical technologist kan Social Hygiene Clinic (SHC) kan City Hall nagpahayag sa miembros kan media na naglalangkaw na an may helang nin TB sa ciudad.


Huli kaini, nangapodan si Guevara sa nagmamate na kan helang na TB nganing dai magparagrabe dapat magpa-examin sa saindang laboratoryo asin magpakonsulta sa doctor.


Alagad dai paman nagtaong datus kan caso sa ciudad an pamayo kan SHC.


An Filipinas kabale sa top 10 na mga nasyones na may halangkaw na caso kan TB basa sa report kan World Health Organization.


Alagad piglinaw kan Departamento de Salud na nabubulong an TB kun regular an pagtomar kan bulong na nag-positivo sa sinambit na helang.


An TB sarong infectious disease na nakukua sa bacteria na inaapod na Mycobacterium tuberculosis na nakaka-apektar sa baga kan pasyente. Laen pa kaini, an iba pang parte kan hawak na puedeng ma-apektaran iyo an intestines, katoy, tulang, kidney maging sa puso.


Nagpatanid an DOH na nakakaulakit an helang kun an pasyente nag-aabo na daing tahob an nguso sa paagi kan air droplets.


An mga sintomas kan TB kun an persona padagos an pag-abo, kabali an pagkalintura, pagkolog kan daghan asin likod sa laog nin duwang semana patin naglulutab na may kaiba nin dugo. An pasyente kaipuhan magpakunsolta tolos sa klinica asin sa saindang doctor.

Comments


bottom of page