Caso sa ilegal na pagbitbit nin armas naglangkaw huli sa gun ban

Naglangkaw an caso sa ilegal na pagbitbit nin armas bako lang sa kampanya sa loose firearms envez nagdugang an nabawi kan PNP Bicol sa tahaw kan pagbugtak nin mga checkpoints nganing estrictong maimplementar an Comelec gun ban.

Sa pinaluwas na datus kan Camp Simeon Ola, sinabi ni Spokesperson Lt. Col. Malu Calubaquib abot na sa 48 violators an saindang naarestar poon na maging estricto an checkpoints kan Agosto 28 hasta Oktubre 19 mantang sa loose firearms nabawi kan mga awtoridad an 955 sa limang bulan na operasyon.

An operasyon nganing kumfiscaron si mga nagpaso nang licencia asin kabali digdi si dai licenciado.

An gun ban nagresulta man sa pagkaka-kumfiscar nin 51 assorted firearms, patarum asin 490 rounds of ammunition mientras na 49 caso an sinangat sa jusgado, sabi pa ni Calubaquib.

Alagad sa mga nadakop na violators an duwa igwa nang dating inaatubang na casong illegal possession of firearms na nag-atubang pa nin imbestigasyon huli kan saindang ilegal na mga armas.

Kasunod kan acomplisimiento kan PNP Bicol sa paglapag kan may mga bitbit nin ilegal na armas, an Commission on Election (Comelec) sa Bicol nagpahayag kan saindang pasasalamat nganing makatabang sa matuninong na paz y orden sa nagrarani nang Barangay, Sangguniang Kabataan Elections.