Casong dengue naglalangkaw

Dai pa hinahale an homa sa Covid-19 kan Departamento de Salud naglalangkaw naman an caso kan dengue sa rehiyon Bicol alagad dai pa kunsideradong nakaka-alarma.


Sa pinakahuring listahan kan DOH Bicol naikurit an 77 dengue fever poon kan Mayo 22, 2022 hasta Hunyo 4, 2022 kumpara kan nagtalikod na taon sa kaparehong peryodo na igwa sanang 23 na caso.


Sinabi kan saindang dengue surveillance, an may halangkaw nin caso iyo an Camarines Sur na igwang 49; Camarines Norte igwang 17; Masbate igwang lima, Catanduanes igwang apat asin tigsarong caso sa Albay asin Sorsogon.


An mga casong ini na nakukua sa dengue namok mina-representar nin 235 por cientong paglangkaw.


Si Director Ernie Vera kan DOH Bicol nagpahayag na dapat an gabos na sektor mag-andam asin dapat makontrol nin amay nganing dai mahulog sa epedemya.


Ngunian na Hunyo iyo an National Dengue Awareness Month mantang naglaog na an mga bulan nin tag-uran.


Sinabi pa kan DOH Bicol dapat maging regular na an pag-praktis kan 4-S. 1. Search and Destroy, 2. Seek Early Consultation, 3. Self Protection Measures saka 4. Support Spraying/Misting.


Kan 2019 an opisina sentral kan DOH huli kan padagos na paglangkaw kan casong dengue sa nasyon nagdeclarang National Dengue Epidemic, dapat dai na ini mangyari sa paagi kan pagtarabangan sa kalinigan sa kapalibot kan lambang residencia.


Bako lang digdi sa Kabikolan naglalangkaw an caso maging sa iba pang mga rehiyon na saro sa dahilan kan DOH iyo an padagos nang pag uran na nagiging causa kan marikas na pagdakul kan dengue namok.


Huli kaini, an kalinigan sa luwas asin sa laog kan residencia dapat seguradohon contra sa dengue, sabi pa kan DOH Bicol.


Nangapudan pa an ahencia na dapat magtabang an mga opisyales de barangay sa kampanya laban sa caso mantang dai pa ngani nakakahawas asin yaon pa an huma kan Covid- 19.


An Barangay Health Workers dakulang bagay sa barangay sa advocacia laban sa sinambit na helang.


Mientras tanto sa pinakahuring datus kan DOH Bicol igwa pang 342 na activong caso sa Covid -19 asin padagos nang nasa low risk sa virus an satong rehiyon.


Hababaon na an utilization rate sa mga Covid wards, maging an naggagamit kan ventilato saka ICU room. (dpa)