Casong dengue sa Bicol naglangkaw 5 % - DOH

Naglangkaw nin cinco por ciento an caso kan dengue sa Region Bicol na maabot na sa dos mil na caso ngunian na 2026 poon kan Enero hasta Agosto kumpara sa kaparehong peryodo kan nagtalikod na taon 2025.

Huli kaini, an Department of Health Bicol Center for Health Development sa pamamayo ni John Dominic Bolunia, National Aedes-Borne Viral Disease Prevention and Control Regional Program Manager, nagpatanid sa publico na bako lang responsabillidad kan mga health worker an paglaban sa caso envez an gabos na indibidwal, cada familia, asin comunidad dapat magkasararo na laban sa naglalakop na caso sa rehiyon.

Kun igua nang sintomas, kaipuhan darahon tolos sa doctor o sa clinic maging sa hospital nganing malikayan an peligrosong kumplikasyon, sabi pa kan DOH Bicol.

Liwat nindang pigsambit an amay na paglaban o ‘‘prevention’’ siring kan mga minasunod palaobon an mga pig-eestaran kan dengue namok kabale an paglinig sa mga canal; pagsulot nin bado na contra dengue o inaapod na mosquito repellant; asin amay na pagconsulta kun nakakamate na nin sintomas.

Sa ngunian an mga lokal na gobierno sa suporta kan saindang mga municipal health officers, barangay health workers, opisyales de barangay nagtatarabangan laban sa paglakop kan helang.