Castigohon an mga ‘‘magnanakaw’’ kurahaw sa protesta laban kurapsyon

‘‘Usigin, Parusahan ang mga Magnanakaw sa Senado, Kongreso, DPWH, LGU Forthwith’’ ini an saro mga kurahaw sa ginibong matuninong na protesta kan progresibong grupo sa Plaza Rizal, Ciudad nin Naga contra kurapsyon kasabay sa ika-53 na pagdeclara kan Martial Law kan Septiembre 21.

Naging matuninong an protesta kaibahan an grupo kan BAYAN Camarines Sur, Ateneo de Naga University for Palestine, CEGP Bicol, grupo nin paraoma, Karapatan Bicol, Anakbayan, Gabriela Women’s Party, Bunyog, Kabataan Partylist Camarines Sur, Act Teachers, yaon man an grupo nin trabajadores asin dakul pang iba.

Saindang kurahaw an laila nang marhay na kurapsyon sa nasyon na dapat castigohon an mga envueltong opisyales kan DPWH, contractor asin politico.

Pinaheling ninda an kaangutoan sa paagi kan pagtinak-tinak asin parakit kan mga retrato nin mga politico na tinatakopan sana an isyu sa tahaw kan mga ginigibong imbestigasyon.

Kabale pa sa saindang isyu na maninigo sanang matawan tamang kompensasyon an mga biktima nin calamidad.

Nationwide an mga ginibong hiro protest rally laban sa kurapsyon alagad digdi sa Bicol naging matuninong mantang naka-alerto man an mga awtoridad base sa mga natipon na report kan PNP.

Hiro protesta laban sa kurapsyon kan progresibong grupo sa Plaza Rizal kan Ciudad nin Naga kan Septiembre 21. (Retrato: The Democrat FB)