Casureco 2 matapyas tarifa sa kuryente

Matapyas nin sagcod sa on peso an tarifa kan Camarines Sur II Electric Cooperative (Casureco II) Inc. oras na maging epektibo an perermahan nin kontrata kan cooperativa asin kan saro pang bagong power supplier na hababa an generation cost na iyo an Power Sector Assets and Liabilities Management Corporation (PSALM) para sa 10-Megawatts power supply

An PSALM iyo an may pinakabaratong presyo kan suplay nin kuryente kun ikukumpara sa presenting mga power supplier na San Miguel Energy Corporation (SMEC), AES Masinloc. An bagong power supplier igwang hababang generation cost na nagcacantidad sanang Php5.00 mantang sa presenteng power supplier nagcacantidad nin P12.0 /Khw.

Kan dai pang giyera sa Ukraine asin Russia, dai pa nagpaparalangkaw an presyo sa produkto nin petrolyo asin nagkaigwa pa nin problema sa oring na pig-aangkat sa ibang nasyon, An tarifa kan Casureco II nag-aabot sana sa P8 hasta P10 cada kilowatt hour alagad sa ngunian nag-aabot na sa P18.

Si Rinner Bucay, opisyal na parataram kan cooperativa nagpahayag sa Bicol Mail na ngunian na Enero 26, 2023 magkakaigwa na sinda nin perermahan kan PSALM asin kan Casureco II na papangenotan ninda General Manager Emelita Candia asin Board President Gay Loreto Pabines.

Saiyang sinabi na an Casureco II nagkukunsomo nin sagcod sa 80 megawatts alagad masuplay sa ssinda an PSALM nin sampolong megawatts.

Sa 10 megawatts na power supply nin kuryente maabot sana sa on peso an puedeng ibaba sa saindang tarifa cada kilowatt hour, sabi pa ni Bucay.

An Camarines Sur IV Electric Cooperative sa Partido area iyo sana an may kontrata sa PSALM sa apat na cooperativa sa Camarines Sur huli kaini sinda sana an may hababang tarifa sa Camarines Sur na nagdadalagan sa P9 hasta P10.

An Casureco II enot nang naghuros an saindang power rate para sa ngunian na Enero 2023. Sa residential – P17.3085/KWH nagbaba nin P0.2038; sa Low voltage – P16.4242/KWH nagbaba nin P0.2121/KWH; asin sa High voltage – P15.4490/KHW nagbaba nin P0.2320. (DPAureus)