Casureco II iguang 3 bagong mga director

Tolong elihidong mga director kan Camarines Sur II Electric Cooperative (Casureco II) nakatalaan nang mag-atendir sa board meeting sa huring semana ngunian na bulan kasunod kan saindang kapangganahan komo director sa ginibong special elections kan Abril 9, 2022.


An mga director kinababalihan ninda retiradong department head kan Casureco II, Maria Luisa Bongalos-Rosin na nanggana sa district election sa Naga South District na mayong kalaban asin nakakua sana nin 34 voto; sa Pili District an re-electionistang director Domingo Changcoco III na nakakua nin 1,191 voto contra sa saiyang kalaban Nonie Catimbang igwa sanang 785 voto; asin sa Minalabac District ginana ni retiradong principal William Basmayor sa voto 1,613 contra sa saiyang duwang kalaban na sinda Eduardo Arnel Ramos 1,537 mantang si Arcangel Tubale igwa sanang 49 voto.


Sinda tolos pigproclamar kan Abril 9 na mga ganador sa eleksyon kan Casureco II District Election Committee.


An Naga South District matapos nin sampolong taon na bakante an tukawan sa junta magkaka-igwa man giraray nin representante asin Minalabac District inabot nin dose taon.


Sinabi ni Rinner Bucay opisyal na parataram kan Casureco II an Canaman asin Bombon Districts na parejong bakante an tukawan sa junta iyo an masunod na magkakaigwa nin district elections alagad posibleng gibohon sa huring cuarto ngunian na taon depende sa ipapaluwas na memorandum kan National Electrification Administration.


Kan taon 2021 dapat gibohon an district election sa tolong distrito alagad iginilid huli kan pandemaya. (DPAureus)