Casureco II liwat mapalangkaw tarifa nin kuryente sa Agosto '26

An Camarines Sur II Electric Cooperative (Casureco II), Inc. na dating may pinakababang tarifa sa mga cooperativa nin electricidad nagkunfirmar na liwat naman sinda mapatong nin tarifa nin maabot sa on peso sa sunod na bulan nin Agosto 2026.

Alagad piglinaw kan Casureco II sa paagi kan saindang opisyal na parataram, Rinner Bucay bako lang sinda an apektado envez an gabos na mga cooperativa huli kan paglangkaw kan generation charge kan mga power suppliers.

Sa ngunian an presenting power rate sa residential – P12.5913kWh; sa low voltage – P11.7098kWh; asin sa high voltage – P10.3715kWh. An presenting tarifang ini ciertong malangkaw sa sunod na bulan alagad dai pa sinda makatao nin exactong cantidad mientras na maagi sa proceso kan Energy Regulatory Board (ERC).

Kabale sa tinutokdong dahilan iyo an liwat naman na paglangkaw kan presyo sa productong petrolyo sa mercado internasyonal sa tahaw kan liwat naman nangyayaring krisis sa Middle East. Naglalangkaw man an cantidad na binabakal kan mga cooperativa sa Wholesale Electricity Spot Market (WESM).

An paglangkaw kan tarifa sa kuryente nagpoon kan Mayo, Hunyo, Hulyo sagcod sa Agosto.

Sinabi kan Casureco II na sa premirong semana kan sunod na bulan maanunciar sinda kun pera an dugang na tarifa sa kuryente.