Casureco II matapyas nin tarifa sa kuryente bako huli sa ERC order

Marerealisar na an pagtapyas nin tarifa sa kuryente kan Camarines Sur II Electric Cooperative (Casureco II) sa sunod pang bulan nin Hunyo 2023 matapos magpoon nang magsuplay an Power Sector Assets and Liabilities Management Corporation (PSALM) sa saindang kasundoan na 10 megawatts (MW) na power supply poon kan Abril 26, 2023.

Alagad sinabi ni Rinner Bucay, opisyal na parataram kan cooperativa dai pa sinda makatao nin exaktong cantidad kun pera an itatapyas sa tarifa mantang naglalangkaw pa an generation cost kan Wholesale Electricity Spot Market (WESM).

Kan hapoton an Casureco II kun nuarin iimplementar an ERC Order sa pagbaba kan singil sa tarifa alagad mayo pang kasimbagan asin dai pa makatao nin opisyal na pahayag sa isyu kan kasugoan kan ERC.

Nagpoon an negosasyon kan Casureco II sa PSALM nganing makabakal nin baratong generation cost kan nagtalikod na taon 2022 asin ngunian sana narealisar kun kasuarin nagkaigwa nin controvercia sa refund payments asin ibaba an tarifa sa kuryente base sa ERC Order petsado Abril 17, 2023.

An PSALM iyo an may baratong generation cost na cantidad sanang P5.00 per kW kumpara sa ibang presenting power supplier kan Casureco II na nag-aabot sa P12.00 per kW.

Sinabi pa kan Casureco II na an PSALM magsusuplay nin 10MW generation capacity sa panahon kan ‘‘peak hours’’ poon alas 10:00 nin aga hasta alas 7:00 nin bangui.

An halangkaw na tarifa kan cooperativa nag-aabot pa sa P15.4444/KWH sa residential sa low voltage – P14.5684/KWH asin sa high voltage P13.5077/KWH.

Si dating tarifa cantidad sanang P8.00 hasta P10.00 alagad nagparalangkaw huli kan paglangkaw kan presyo kan pig-aangkat na oring saka pagparalangkaw kan presyo kan produkto nin petrolyo poon na mag-giyera an nasyon kan Russia asin Ukraine. (DPA)