CASURECO II nagtalaan district election sa Abril 9
Tolong mga distrito kan Camarines Sur II Electric Cooperative (Casurero II) pigtalaan na an sarabay na special district elections sa Sabado, Abril 9, 2022 alagad an duwang distrito matapos kan diez hasta treceng taon makakapili man giraray nin representante sa junta an miembros-consumedores.
An eleksyon gigibohon sa District III sa Pili, Camarines Sur alagad sa District I kan Naga South District inaabot nin sampolong taon na bakante an tukawan sa junta mientras na sa District V sa Minalabac, Camarines Sur inaabot nin quince taon na bakante an tukawan sa junta. Tolong taon an sarong termino kan sarong miembro kan junta.
An District III na pig-rerepresentaran ni director Domingo Changcoco ma limang taon na sa puesto mantang si huring district election digdi ginibo kan 2017.
Kan nakaaging taon nagpaluwas na nin memorandum an National Electrification Administration (NEA) para sa eleksyon sa sinambit na distrito alagad iginilid ngona huli kan pandemya.
Sinabi ni Rinner Bucay, opisyal na parataram kan Casureco II nagtalaan na kan special elections sa tolong distrito kasunod kan pinaluwas na memorandum order sa sainda kan NEA na dapat magtalaan na nin eleksyon nganing dai na aboton kan local saka national elections sa Mayo 9, 2022.
An ultimo dia kan pagplantiar nin certifico de candidatura pigtalaan kan Marso 30 sa Institutional Service Department Service Division kan Casureco II, barangay Del Rosario, Ciudad nin Naga.
Sampolong distrito an nasa coverage area kan cooperativa nin electricidad alagad anom na elehido asin ika-pito an sarong NEA appointee an nagtutukaw na nagrerepresentar kan sinambit na ahencia.
Sa presente an komposisyon kan mga nakatukaw sa junta iyo sinda Gay Pabines kan Milaor District; John Paul Santa Ana kan Calabanga District; Domingo Changcoco kan Pili District; Nicanor Oriño kan Magarao District; Angelo Cornelio kan Naga North District asin si director Belomoro kan Tinambac-Siruma district.
An mga bakante pang director iyo an mga distrito kan Bombon asin Canaman na posibleng gibohon sa Septiembre ngunian na taon. (dpa)