Casureco II pigsugo kan ERC ibaba an tarifa sa kuryente

Pigsugo na an Camarines Sur II Electric Cooperative (Casureco II) kan Energy Regulatory Commission (ERC) na ibaba na an power rate sa saindang coverage area base sa pinaluwas na desisyon kan ahencia petsado Abril 17, 2023 na pirmado ni Chairman Monalisa Dimalanta.

Ipinahayag ni spokesperson Rinner Bucay kan Casureco II hinahalat pa ninda an kopya kan order asin dai pa makataong exaktong cantidad sa ibabang singil sa tarifa mantang magkakaigwa pa nin board meeting nganing tukaron an orden kan ERC asin magiging kasimbagan.

An desisyon kan ERC matapos kan stakeholders meeting sa Avenue Plaza Hotel room kan Marso 13, 2023 na hinagad ni dating VP Leni Robredo sa chairman kan ahencia sa tahaw kan pinaabot na mga reclamo sa saiya kan miembros-consumedores na mapalangkaw naman tarifa sa kuryente an Casureco II. An ika-duwang miting ginibo kan Marso 23, 2023 na presente si Congresista Gabby Bordado.

An cooperativa pinapasumiter pa kan verify explanation kun tano ta dai sinda dapat castigohon nin administrative penalty.

Nag-orden pa an ERC para sa implementasyon tolos kan pagbaba kan tarifa asin sinusugo pa an Casureco II na dapat ibalik an sobrang bayad sa kuryente poon kan Mayo 2015 hasta sa huring bill kasunod kan orden kan ahencia.

Sa sinambit na miting na hinagad kan dating bise presidente sa ERC, pigbuyagyag na an cooperativa nagpapasunod nin contrata sa power supplier na nagpaso na asin mayong approval sa ERC asin pass-on rates sa consumedores na sobra sa tinutugot kan CAP.

An over charging sa tarifa haloy nang isyu kan consumers group contra sa Casureco II dai pa natukaw si Emelita Candia bilang general manager na nag-agi pa sa nagkaperang general manager asin mga project supervisor na pigdestino kan NEA.

Alagad an sinambit na mga isyu asin iba pa pigcuestion kan Casureco II mala ngani nagpadara kan saindang manifesto sa ERC kan Abril 5, 2023.

An stakeholders meeting kabale sa mga nag-atendir sinda Alcalde Nelson Legacion, Consejal Ghiel Rosales, Consejal Jess Albeus asin nagkaperang negosyante asin iba pang sektor.

Si Consejal Rosales, Chairman kan Committee on Energy sa Sangguniang Panlungsod nagpasalamat ki Robredo huli sa ginibo kaining espuerso nganing maresolberan an reclamo sa halangkaw na tarifa sa kuryente. (dpa)

Nagpoon sa imbitasyon ni Atty. Leni Robredo sa ERC para sa stakeholders meeting alagad nagbonga nin pagtapyas tarifa sa kuryente kan Casureco II

Hale sa FB Page ni Atty Robredo:

1. Kan nakaagi pong Marso, naka resibe ako nin pirang kahagadan sa Casureco II consumers nin tabang pagkatapos na mag announce an Casureco II nin saro na naman na power rate increase. An enot ko pong ginibo, maghagad nin audience sa Energy Regulatory Commission para hapoton kun ano an rekursos na igwa kita bilang mga consumidor. Nakakua po ako nin appointment March 16, 2023;

2.Nin huli kaini, nag schedule po kita nin Stakeholders Meeting sa Avenue Plaza Hotel Board Room kan March 13, 2023. Nagpapasalamat kita na gulping sektor ang representado sa meeting – yaon ang City Government of Naga, MNCCI, NCPC, Professional Groups, Civil Society Representatives. Sa meeting na ito, pig dangog ta si boses kan mang iriba ibang sektor. Preparasyon ito sa meeting ko sa ERC sa March 16, 2023;

3. Kan nagduman po ako sa ERC, kaatubang ko sa meeting si Chairman Mona Dimalanta, Commissioners Catherine Maceda and Floresinda Baldo-Digal, ERC Executive Director Nancy Fajardo, and other officials of the ERC. Duman sa meeting na ito, pig correct kan ERC si ibang data na iprinisentar kan ibang nag attend sa Stakeholders Meeting. Dahil digdi, pig request ta sa ERC na kung puwedeng maka bisita sinda sa Naga for a Dialogue with Stakeholders;

4. Napaonrahan si satong request. Kaya kan March 23, 2023, binisita po kita kan ERC sa pangengenot mismo ni Chairman Mona Dimalanta. Bago pa po kan petsang ini, pig inform ko na si Mayor Nelson Legacion na mayo ako sa March 23 kaya kun puwede siya si mag present kan si pig orolayan kan Stakeholders Meeting. Pinakiulayan ko man po si Congressman Gabby Bordado na irepresent ako sa meeting. Si representative kan opisina mi saka si Mr, Reuel Oliver kan Naga City Government an nagcoordinate para sa presentation;

5. Naging very productive si meeting, halawig an naging diskusyon pero an pinaka importante, natawanan pagkakataon si mga sektor na maka boses kahampang an ERC;

6. Kan nakaaging semana, naka resibe na kitang kopya kan desisyon kan ERC dated April 17 manungod sa satong problema. Kan na resibe ta si desisyon, pig request ta sa Secretariat ta na padarahan ng kopya si gabos na Stakeholders na nag attend kan meeting.;

7. Halawig si Desisyon na ibinaba pero saro sa mga findings, padagos na nagbabakal kuryente an Casureco II sa MPPL sa presyong halangkawon kumpara sa average sa Luzon dawa expired na ang Contract for the Supply of Electrical Energy. Pigsabi sa Desisyon na ang Mandato iyo na dapat nag aagi sa sarong Competitive Selection Process bago mag secure nin power supply, na dai sinunod sa orolay;

8.Nin huli kaini, kabali sa Desisyon na ibinaba an kasuguan sa Casureco II na i-REFUND ninda si gabos na nakolekta na generation rate in excess duman sa load weighted average NPC TOU rate sa Luzon poon May 26, 2015 hanggang sa last billing bago nagbaba ining desisyon. An boot sabihon kaini, may maasahan kitang refund dahil sa over billing na ginibo kan CASURECO II;

9. Pig tatawanan pang 15 days an MPPL para mag sumitir nin written explanation kun papano niya pig compute ining Generation Rate Charge na halangkawon sa Luzon average. Pig tawanan man 15 days an Casureco para mag show cause kun tano dai siya dapat patawan nin Administrative Penalties.

Nagpapasalamat po kita sa ERC lalo na ki Chairman Mona Dimalanta sa marikas na pag responde sa satong kahagadan. Nagpapasalamat kita sa gabos na Stakeholders na nag ako kan satong imbitasyon para sa May 13 saka May 23 meetings saka sa partisipasyon.

An kopya kan desisyon, puwedeng ma download digdi: www.erc.gov.ph/IssuancesPage/3/0.