Casureco II sa Tinambac, CamSur sinasabotahe

Kinokondenar kan manijamiento kan Camarines Sur II Electric Cooperative (Casureco II) Inc., an ginigibong pang-sasabotahe sa linya nin kuryente sa Tinambac, Camarines Sur na nagreresulta sa halawig na brownout.

Sinabi ni Rinner Bucay, opisyal na parataram kan cooperativa an pang-sasabotaje sa paagi nin pagsabit nin alambre sa poste na nagiging dahilan sa pagpurotok kan saindang transformer sa Barangay Sta Cruz, Tinambac asin kabale sa perwisyo sa brownout iyo an Siruma, Camarines Sur.

Nagpoon an pamemerwisyo mga alas siete nin banggui kan Hulyo, Agosto, Septiembre, sagcod kan huring aldaw kan Oktubre. Bako sanang sarong barangay an ginigibong pang-sasabotaje envez sa Barangay Antipolo, Kagliliog, asin Tamban, sabi pa kan Casureco II.

Naaabala an pagbuelta kan suplay nin kuryente kun dai tolos nakukua kan lineman an sinabitan na secondary line kan cooperativa.

Cada insidente saindang pig-oosip sa Tinambac Municipal Police Station alagad dai pa nabibisto an suspek mantang nagpapadagos pa an imbestigasyon.

An arog kaining insidente premirong nangyayari sa Tinambac na an mayor na apektado an ginatos na miembros-consumedores.

Hagad kan MPS sa mga residentes kan barangay na maaraman an mga nagpapasaway nganing sangatan nin caso.

Mga alambre na ginagamit sa pagsabotahe kan linya nin kuryente nakua kan lineman kan Casureco II.