Casureco IInagtalaan nin district elections sa Hulyo 23

An Camarines Sur II Electric Cooperative (Casureco II), Inc. liwat nagtalaan nin district elections sa maabot na Hulyo 23, 2022 mientras na nagsikad na pagplantiar nin certifico de canditura asin utimong aldaw kasoodmang Miercules, Hulyo 13.


An National Electrification Administration (NEA) nagpaluwas nin memorandum sa Casureco II para sa district election nganing makumpleto na an mga bakanteng tukawan sa junta.


Tolong mga distrito magkakaigwa nin eleksyon sa District II kan Naga North; District VII kan Magarao, asin District VIII kan Bombon.


Sa pinaluwas na anuncio kan Institutional Services Department-Member Service Division (ISD-MSD), halipot sanang panahon an saindang pag-andam sa eleksyon base sa memorandum kan NEA.


An ISD-MSD iyo an nagrerecibe kan COC alagad gabos na mga candidato sesernihon kan opisina kun sinda calificadong mga candidato.


Mapoon an eleksyon alas 8:00 nin aga hasta alas 5:00 nin hapon.


Sinabi pa an mga calificadong candidato iyo an idedeclarang opisyal na candidato sa pigtalaan na district election.


Kan nakaaging Abril 9, 2022 nagkaigwa na nin district elections sa mga banwaan kan Pili, Minalabac asin Naga South kan Ciudad nin Naga.


Mientras tanto, an kahurotan kan miembros-consumedores na gibohon nang duwang distrito an Tinambac-Siruma alagad sagcod sa ngunian mayo pang desisyon an NEA. (dpa)