Casureco IV mantenido an hababang tarifa nin kuryente

Dawa naghuros na an tarifa kan Casureco II alagad an Camarines Sur IV Electric Cooperative (Casureco IV) sa Partido area kan Camarines Sur na iyo an may pinakabaratong tarifa sa kuryente sa apat na cooperativa nin electricidad sa Camarines Sur na nagaabot sanang P10.29 cada kilowatt hour base sa power rate sa bulan nin Abril 2023.

An Casureco IV na pinamamayohan ni General Manager Renato San Jose an saindang power supplier iyo an Power Assets and Liabilities Corporation (PSALM) na may hababang presyo sa generation cost na cantidad P5.00/KWH kumpara sa ibang supplier na nagaabot sa P12.00/KWH.

Daing controvercia an manijamiento sa halangkaw na tarifa siring kan reclamo kan miembros-consumedores kan Casureco II na nagsusuplay nin kuryente sa mga banwaan kan tercer distrito kabale an Tinambac asin Siruma, sakop kan Partido area.

An Casureco II sakop an Ciudad nin Naga asin mga banwaan kan tercer distrito kan Camarines Sur iyo an may pinakalangkaw na singil sa tarifa sa kuryente na haloy nang pigrereclamo kan miembros-consumedores. Base sa saindang April 2023 power rates sa residential nagaabot na sa P15.4444/kWh hale sa dating P17.00 sa low voltage – P14.5684, asin sa high voltage – P13.5077.

Alagad huli sa ERC Order petsado Abril 17, 2023 obligado na magsunod sa tarifa na dapat P11.29 sa residential, mantang sa low voltage – P10.00 asin sa high voltage naghuros sa P9.66. Epektibo sa Mayo 19, 2023 an bagong tarifa.

Nagsusunod sa Casureco IV iyo an Casureco III sa Rinconada district na igwang P11.64 cada kilowatt hour sa residential, P10.29 sa low voltage asin P8.42 sa high voltage.

An saindang power supplier iyo an SMEC asin WESM alagad hababa an singil sa tarifa.

Magigirumduman an Casureco III lakma an kamugtakan finansyal huli kan pakikiaraman kan ibang politico sa manijamiento sagcod na kinapotan kan taohan kan National Electrification Administration.

Nakabangon an cooperativa kan magbugtak si dating Presidente Rodrigo Duterte nin Task Force na pinamayohan ni Casureco I General Manager Ana Sylvia M. Alsisto mantang an nagtutukaw na acting general manger/project supervisor hale sa NEA.

Sunod an Casureco I nagsakat na sa P12.51 an residential, sa low voltage P11.32. an saindang power supplier dating SMEC mantang kan nakaaging bulan nin Abril 100% expose sa WESM asin sa ngunian sa PSALM.

Alagad sa masunod na bulan posibleng maglangkaw sa P13.00 cada kilowatt hour an singil sa tarifa. An manijamiento pinapadalagan ngunian kan taohan kan NEA matapos magretiro sa serbisyo kan Deciembre 2022 si dating GM Ana Sylvia Alsisto na binayaan niya an cooperativa pitong taon nang triple A sagcod sa ngunian. (dpa)