CATANDUANES IYO AN MAY PINAKAHALANGKAW: Inflation rate sa Bicol nagbaba sa 1.5%-PSA

Nagbaba an inflation rate sa Rehiyon Bikol sa 1.5 por ciento kan Hunyo 2025, sa dating 2.2 por ciento kan Mayo 2025 alagad sa mga provincia kan rehiyon an Catanduanes iyo an may pinakahalangkaw.

Base sa pinakahuring datos kan Philippine Statistics Authority (PSA) Bicol Officer-in-Charge Chief Statistical Specialist Ray Merilla, kan mag-atubang sa miembros kan media.

Sa mga provincia kan rehiyon an Catanduanes base sa datos iguang pinakalangkaw na-record sa inflation rate na nag-abot 3.1 por ciento, nagsunod an Sorsogon iguang 1.8 por ciento, Albay – 1.6 por ciento. Masbate – 1.5 por ciento, Camarines Sur – 1.2 por ciento asin Camarines Norte – 0.5 – por ciento.

Sinabi pa ni Merilla an average sa Bicol poon kan Enero hasta Hunyo 2025 naka-record nin 2.2 por ciento.

Nagtutubod an ahencia na an paghuros kan inflation huli kan hababang presyo sa lado nin produkto sa pagkakan asin non-alcoholic beverages, na nakacontribuer nin 52.4 por ciento.

Sa tahaw kan pinaluwas na datos na ini kan ahencia an publico padagos an reclamo sa halangkaw na presyo kan mga mayor na barakalon sa mercado. Ini pigtutubod huli kan padagos na paglangkaw sa produkto nin petrolyo.