Catanduanes saro nang ‘‘insurgency free’’- 9th ID
Natunaw na kan 9th Infantry Division kan Philippine Army sa Bicol an organisasyon kan Communist Party of the Philippine /New People’s Army (CPP/NPA) sa islang provincia kan Catanduanes na dagos nang pigdeclarang ‘‘insurgency free’’.
Si Major General Noe Alberto Peñafiel nagpahayag sa prensa huli kan saindang pagsurod sa mga barangay, suporta kan comunidad asin LGUs kan provincia kan Catanduanes dagos nang nagaba an guerilla front kan CPP/NPA. Saro pa sa dahilan na si dating controlado kan kumunistang grupo natunaw na kasunod kan saindang mga operasyon laban sa mga kalaban kan gobierno asin mayo na nin mga sinyales na igua pang nawalat na organize front.
An sinambit na provincia iyo an enot sa Bicol na saro nang ‘‘insurgency free’’.
Dawa saro nang insurgency free alagad mamantenir pa digdi nin sarong batalyon kan militar hale sa 9th ID.
Kasunod kaini, kan Deciembre 3, 2024 an Catanduanes opisyalmente nang pigdeclara komo ‘‘State of Stable Internal Peace and Security durante sa ginibong seremonya sa Provincial Capitol Dome, Virac sa provinciang ini.
Nagkaigua nin programa asin pirirmahan sa Memorandum of Understanding (MOU) na nagrereconosir sa provincia asin sa pagtarabangan na maging matuninong asin estable an paz y orden.
Kabale sa mga nagpirma sa MOU iyo sinda LTJG Kenny Villafuerte PCG Commander, Coast Guard Station Catanduanes, PBGEN Andre Dizon, PNP Regional Director V, MGEN Noe Alberto Penafiel, PA Commander, 9th Infantry Division kan Philippine Army sa Bicol, asin Gobernador Joseph Cua kan Catanduanes.
Pinahayag man ni Cua na dakulang bagay sa sainda na saro nang matuninong na provincia mayo nang mga encuentro kan NPA asin PA maging PNP, makakatabang sa economia maging sa pag-angat kan mga nagdadayong turista.
Comments