CCTV cameras sa SP bldg pinataranggal ni VG Papin

Pili, Camarines Sur--- Pinataranggal na ni Bise Gobernador Imelda Papin mga alas 4:30 nin hapon, Enero 31, 2022 an 24 closed-circuit television (CCTV) cameras na nakapalibot sa mga opisina kan vocal, bise gobernador asin sa luwas kan edificio kan Sangguniang Panlalalawigan huli kan ilegal na pinakabit soboot ni Congresista LRay Villafuerte kan segundo distrito kan Camarines Sur.

Inaako ni Papin na saiyang mga personajes an sinugo niyang magharale kan 24 cameras mantang enot na niyang pigpa-blotter sa Municipal Police Station kan Pili, Camarines Sur kan Viernes, Enero 28, 2022. Saiyang pigrereklamo na ilegal an enot na pinakabit na mga CCTV cameras huli ta dai niya awtorisado mantang dai lamang nagpa-aram sa saiyang opisina.

Matapos kan insidenteng taranggalan kan CCTV cameras an sarong pig-ngaranan na Segillion jefe kan Task Force Kalikasan nagpa-blotter man sa MPS huli kan fuersahan na pagharale kan mga kinabit na cameras kan Capitolio.

Sinabi ni Papin sa miembros kan media na bilang pamayo kan Sangguniang Panlalawigan dai nagpa-aram sa saiyang opisina kan kinarabit na CCTV cameras mantang luwas naman sa 2nd Congressional District ni Cong. LRay an Capitolio na yaon sa Pili, Camarines Sur sakop kan tercer distrito kan provincia.

Nagtutubod an bise gobernador na may motivo political an pinalibot na CCTV cameras mantang candidato siyang gobernador laban ki Luigi Villafuerte, aki kan lehislador.

Nagtutubod pa siya an pagpakabit kan lehislador kan mga CCTV cameras nganing ma-monitor an saiyang actividades sa saiyang candidatura bilang gobernador kan Camarines Sur.

An kontrol asin monitor mayo sa Sangguniang Panlalawigan, sabi pa ni Papin.

Sa press conference, sinabi kan bise gobernador na afuera kan ilegal na pagkabit kan CCTVs igwa pang insidente kan Enero 20, 2022 nin pananapak soboot an congresista sa tolong security guards kan SP kan magsayumang palaogon an personajes na pinadara kan lehislador.

Huli kan insidenteng ini, pinaapod na kan junta provincial an pigsasabing tolong guwardya na biktima kan lehislador nganing ma-inbestigaran alagad dai man nagtunga sa sesyon sa dahilan na nawawara na asin dai na naglalaog sa saindang trabajo, sabi pa ni Papin.

Alagad sa lado ni LRay sa saiyang statement na nagluwas sa BH TV, sarong social media page ni Ruel Saldico, si LRay nagpahimotik kan akusasyon asin inaapod kaining ‘‘fake news’’.

‘‘Almost 3 years natin hindi nakita at narinig itong absentee vice governor ng Camarines Sur. Tapos biglang sumulpot dahil eleksyon na para mag papansin at magpalabas ng fake news. Mel, maski isang linggong serbisyo magbigay ka naman. Palibhasa ang dami mong ghost employees kaya an tawag sayo, Ghost vice governor. Hindi ka na nagpapakita, an dami mo pang kalokohan.’’, sabi pa ni LRay. (dpa)