CDC kan PA padagos an pagkalap kan mga reservists

Ni Sonny Malate

Padagos an ginigibong pagkalap, paglista asin pagmobilizar  kan mga reservists sa bilog na nacion sa paagi kan Community Defense Center kan Philippine Army.

Segun ki LTC Josephus Emar M. Rempillo, Director, 502 CDC, 5RCDG, Reserve Command, PA, Camp Martillana, Pili, Camarines Sur, sa probinsya kan Camarines Sur nagsikad na an pakikicoordinar kan officina ninda sa mga gobyerno local  katakod kaini.

Dagdag ni Rempillo, nagkakapira nang mga banwa an pigdulok ninda. Sa Partido Area, naenot na digdi iyo an banwaan kan Goa asin San Jose.

Kabarale sa  mga reservists iyo an nagcompleto sa colegio kan Reserve Officer Training Corps (ROTC). Sinda pigmomobolizar kan gobyerno sa panahon nin emergencia nacional, giyera, tiempo nin calamidad asin ibang kasiribotan sa bilang force multiplier.

Nanotaran kan oficial na rinibo an numero ninda sa bilog na nacion  asin an kadaklan sa sainda posibleng binawian na nin buhay, nasa ibang nacion asin iba-ibang estado sa buhay. 

Sa paagi kan tracking na ginigibo kan Community Defense Center, naaaraman kun sairisay sa sainda an posibleng gamiton kan gobyerno an serbisyo sa panahon nin emergencia, giyera , calamidad asin ibang situacion.

Tanganing maging pusog an pagtatarabangan entre kan mga LGUs asin kan CDC, si Rempillo asin personahes niya an minadulok sa mga alcalde sa paagi nin courtesy call.

Siring man,  sinda minaatubang sa session kan Sangguniang Bayan. Digdi saindang pigbubusol na maibale sa Peace and Order and Public Safety Plans (POPS Plan) kan gobyerno local an saindang kalakawan. 

Nanotaran asin naogma si Rempillo na an mga oficiales local sa Camarines Sur suportado sa saindang kalakawan. Pighiihiling niya na ini positibong maresulta sa pagsustenir kan paz y orden sa comunidad.

Si Rempillo an nangapodan sa mga reservists na makipagcoordinar sa saindang gobyerno local o mga focal persons ninda para sa facil asin madaling pagkalap kan mga reservists sa mga localidad. 

Bago nadestino si Rempillo sa Camarines Sur siya hale sa probinsyang Catanduanes kun saen siya nataohan nin sarong award sa pagreconusir sa pambihira niyang naginibohan katakod sa oficina kan Community Defense Center.