CEO nag-iinspeksyon sa mga simbahan, iba pang mga edificio

Naglilibot an mga personajes kan City Engineer’s Office (CEO) kan Ciudad nin Naga nganing mag-inspeksyon sa mga edificio komersiyal, simbahan asin iba pang estractura nganing aramon an kapusogan bilang pag-andam sa mga biglaan na paglinog.

Alagad an saindang pig-eenot na bisitahon iyo an mga simbahan na igua nang kaloman o ginatos nang taon kan ini itugdok kan panahon pang Español.

Ini an mga pahayag sa media ni City Engr. Elmer Albo nganing aramon an kapusogan sa tahaw kan nangyaring makusog na linog sa provincia nin Cebu na dakul an mga nagrampahog na mga darakulang edificio asin iba pang estractura. An linog ano man na oras nangyayari mientras na mayo pang experto nganing maaraman kun magkakaiguang makusog na linog. Bakong arog kan bagyo na madaling na-aaraman kan Philippine Atmospheric, Geophysical and Astronomical Services (PAGASA).

An saro pinapaseguro kan CEO iyo an regular na pagreparo kan Naga City People’s Mall na perming nagkakaigua nin danyos sa ibang parte kan edificio kun nagkakaiguang paglinog.

Sagcod sa sinusurat an baretang ini mayo pang report hale sa CEO kun igua na sindang pinatanidan na kagsadiri nin edificio na delicado sa linog.