Charlie Kirk

Labing duwang gatos na ribong (200,000) tawo an nag pasiring sa estado kan Arizona sa Amerika nganing mag atender nin sarong memorial.

Sobrang sarong gatos na milliones (100,000,000) an nag daralan kan memoryal na ini sa paagi nin telebisyon, YouTube, asin man laen-laen na paaging video.

Mga Kotoliko, Protestante, Ebanghelyo, asin iba-ibang relihyon kabali na duman si mga Ateismo, an mga naki damay.

Presente man si Pesidente asin bise Presidente kan Amerika, mga senador, mga kongresista, asin mga miembro kan kabinete.

Man laen-laen na edad an nag atender. Kadaklan sainda mga jovenes na nasa kolehyo, hayskul asin unibersidad. Dakul man na mga mag-ama, mag-ina, asin mga kairiba an enterong pamilya.

Sarong dakulang istadium na nagin garo sarong dakulang katidral – nag kakarantahan nin mga ebanghelyong musika. Sarong tiripon na pano nin tawo sa pag samba sa Kagurangnan.

Nangyari ining okasyon na ini kan naka aging duwang Domingo. Sarong seremonya sa memorya kan sarong tawo na an pangaran Charlie Kirk, 31 an edad. May agom asin may duwang sadit na aki.

Siisay si Charlie Kirk?

Kan taon 2012 nag pundar si Charlie Kirk nin sarong organisasyon na inaapod na Turning Point USA. 18 pa lang si edad niya kaidto. Nag para dakula an Turning Point. An ginigibo kan grupong ini iyo an pag propagar kan mga konserbatibong halaga. Nagin prominente asin makusog na pwersa ini sa mga eskwelahan asin mga jovenes.

Nag tata’o sinda nin mga komperensya manungod sa importansya kan pagtubod sa Diyos, sa marhay na pamilya, patriotismo, respeto, galang sa kapwa tawo, asin mga konserbatibong ugali na nawawara na sa maribok na kinaban ngunian.

Nag tutubod si Charlie na an gabos na problema o iriwal-iwal madadara sa pag urulay. Natubod man siya na gabos na diferensya sa politika o sa relasyones madadara sa pag urulay. Mas dakula daa an magigin problema kun dae ta pag urulayan an mga diperensya ta sa mga iba-ibang pag tubod.

Sa pag libot kan grupo ni Charlie sa mga eskwelahan, sinisimbag niya an mga kahaputan manungod sa politika, aborsyon, transgender, pamilya, respeto, problema kan mga professor sa pag tukdo, diskriminasyon, mga hinanakit, saka iba-ibang tema na nasa isip kan mga estudyante.

Pig sisimbag niya man itong mga hapot kan mga nakaka halo na mga may edad nang tawo na bako man mga estudyante.

Nakiki pag debate si Charlie sa mga estudyante sa marhay na paagi. Dae siya na aangot maski na siya minumuda kan mga radikal na istudyante. Sa gabos na pag debate ni Charlie, enot niyang pirming sinasabi na si Jesus an pinaka importante sa buhay kan tawo.

Nagin makusog asin bantog na lider si Charlie sa mga jovenes. Dakul an mga nakumbinsi niya manungod sa pag tubod asin pag umaw pirmi sa Kagurangnan.

Pirmi man sinasabi ni Charlie sa mga jovenes an importansya kan pagpa kasal asin magka pamilya. An sabi niya an pagka igwa nin pamilya makaka pakarhay kan buhay. Dae daa kamo ma basol kaini. Kaya sabi niya: “Having a family will change your life in the best ways, so get married and have kids. You won’t regret it.”

Pero may mga naangot man sa mga pag tubod ni Charlie.

Kan Septyembre 10, mientras nag tataram si Charlie sa tahaw kan mga pirang ribong studyante, binadil siya, tinamaan sa liog, asin nagadan. Presente si agom ni Charlie saka duwa niyang sadit na aki sa insidenteng ini. Segun sa bareta sarong radikal na tawo na may kabit na transgender an nag badil ki Charlie

Kadakul na mga tawo an nabigla, naangot, asin namundo. Pero ka hanga-hanga an nangyari sunod. Mayo sa mga miembro kan Turning Point saka mga taga-hanga ni Charlie na mga jovenes an nag gibo nin karibukan. Mayong nangyaring mga rayot, harabunan, mga demonstrasyon, pag sulo sa mga auto, etc.. na arog kan ginigibo kan mga radikal na tawong ina apod na mga “leftist”.

Imbes na karibukan, puro pag pupuyat sa pag pangadye, sulo nin mga kandila, asin pag belar si nangyari. Sarong senyal na marhay si mga tukdo ni Charlie sa mga kabuhan niya.

Sa ibang lado, may mga radikal man na mga dae nag uuyun ki Charlie. May mga nag selebrar kan pag asasinar ki Charlie. Pero digdi mahililing kung anong klaseng mga tawo an mga ini. Mga tawong nauugma sa kagadanan kan sarong joven na ama na may binayaan na agom asin duwang sadit pang aki.

Pero sa gabos na ining nangyari, si pinaka dakula na bagay na hinangaan kan enterong mundo, iyo itong ginibo kan agom ni Charlie. Kan nag taram si Erika Kirk na agom ni Charlie, sinambit niya si sinabi ni Kristo sa krus na “patawaron mo man sinda ta dae ninda aram an ginigibo ninda.”

Pagka tapos masambit ini ni Erika, sinabi niya na pinapatawad niya si nag badil asin nag gadan sa agom niya.

Puro turo nin luha kan mga tawo an mahihiling duman sa memoryal ni Charlie. Grabe ining namatian ninda sa pagpatawad ni Erika.

Segun man sa mga pahayag asin bareta, nag dakul si mga nag simba resulta kan paka gadan ni Charlie. Nag dakul man daa si mga nag atender nin mga Bible study sa enterong Amerika. May mga pig interbyu man na mga tawo na haloy na daa sinda dae nag sisimba pero nag balik daa sinda sa pag simba ta na inspira sinda kan mga gibo ni Charlie.

An sabi man kan sarong bantog na Kardinal sa simbahan Katolika, na si Timothy Dolan, si Charlie Kirk daa sarong modernong San Pablo. Dagdag niya pa na si Charlie sarong misyonaryong ebanghelista asin sarong bayani.

Segun man sa taga pag taram kan Vatican na si Mateo Bruni, pinangadye daa kan Santo Papa si Charlie asin an saiyang agom saka duwang sadit na aki.

Sinabi man sa mga surbey na pinaka dakulang memoryal sa historia kan Amerika si nangyari sa Arizona.

Sa mga oras na ini labing 120,000 nang mga grupo asin mga eskwelahan an mga nag aplikar na magka igwa man sindang Turning Point USA sa mga lugar ninda.

Nagadan si Charlie kan naka aging Septyembre 10. An oras nin kagadanan niya alas 12:23.

Sa Biblia, an John 12:23 sinasabi: “Very truly I tell you unless a kernel of wheat falls to the ground and dies, it remains only a single seed. But if it dies, it produces many new kernels – a plentiful harvest of new lives.”

Sa personal kong pag tubod bako ining koinsidensya. An gustong sabihon kaini, an binhi kan trigo iyo an mission o ministro ni Charlie. An pagka gadan ni Charlie iyo an pag tanum sa daga kan binhi. An pag ani iyo idtong dakul na mga naka iba asin na kumbertir ni Charlie sa pag ministro niya sa Kagurangnan.

An kagadanan ni Charlie bakong katapusan kundi poon kan ministro. Mas nag dakul ngunian an mga napukawan na si Jesus lang an satuyang Kagurangnan asin Tagapagsalvar.

Dios Mabalos po.