City Hall maimplementar nin dugang na drainage project

Igwa pang nakatalaan na drainage project an iimplementar kan lokal na gobierno kan Ciudad nin Naga hali sa fundo kan infrastraktura sa 2023 annual budget.

Si Consejal Vidal Castillo, pamayo kan Committee on Infrastructure sa Sangguniang Panlungsod nagsabi dawa na ngani dai man totalmente dai nahahali an problema sa tubig baha dapat ipadagos kan ciudad an mga lugar na kaipuhan pa an drainage project.

An dagdag na kaparejong proyekto makakatabang nganing marikas na pagbaba kan tubig pasiring sa salog Naga.

An komite ni Castillo hinahalat na an isusumiter na propuestong drainage project matapos maaprubaran na kan sanggunian an 2023 annual budget.

Kan nakaaging semana huli kan haros inabot sa tolong aldaw na mga pag-uran dakul naman na mga barangay an inabot nin tubig baha. Kabali digdi an mga sitio kan Clupa, Villa Carangahan asin iba pang lugar kan Barangay Calauag inabot naman nin paglangkaw kan tubig baha.

Perang administrasyon lokal an pigtawan prioridad an Clupa alagad padagos man giraray an mga nangyayaring pag baha kun tiguran.

Igwa nang ginibong solusyon an ciudad sa drainage sa Clupa sa Brgy. Calauag alagad mayo man nangyari mas nagrarum si tubig baha an dahilan kan City Hall iyo an halawig na pagbulos nin uran.

Afuera sa sinambit na lugar nagkaigwa man nin mga pagbaha sa Sabang, Triangulo, Tinago, Lerma, Igualdad, San Felipe asin iba pang lugar.

Si Brgy. Captain asin Liga ng mga Barangay Federation President Corazon Peñaflor nagsabi na nabigla naman an mga residentes kan saindang barangay apesar na mayong bagyo alagad mas nagrarum si tubig baha.