City Hall nagsyerto dae masingil dugang na buwis

Nagcierto an lokal na gobierno kan Ciudad nin Naga na dai maimponer nin dugang na singil sa buwis dawa mababa an National Tax Allotment (NTA) sa sunod na taon 2023 asin naghuros pa si koleksyon sa buwis huli kan pandemya.


Sa pag-atubang sa miembros kan media ni Alcalde Nelson Legacion, sinabi kaini na mayong mangyayaring pagpasar nin ordinansa nganing makasingil nin dugang na buwis.


Saro na sa ginigibo kan ciudad iyo an paghigot paha siring kan pagsuspendi ngona nin dugang na empleados, pagtipid sa gasolina asin iba pang mga actividades na dapat magbawas nin gastos.


Si Consejal Salvador Del Castillo, vice chairman kan Committee on Appropriation sa Sangguniang Panlungsod enot nang nagsabi na sa masunod na 2023 annual budget kan City Hall mababa an saindang marerecibing NTA dating internal revenue allotment nin sagcod sa Php150 milyon.


An dahilan iyo an hababang koleksyon sa buwis kan gobierno nasyonal huli kan pandemya.


Bako lang an mga ciudades an apektado envez gabos na lokal na gobierno, sabi pa ni Del Castillo.


Sa ngunian huli kan Mandanas ruling naglangkaw nin maabot sa Php260 milyon an NTA alagad sa masunod na taon ciertong maiinaan nin Php150-M.


Sa 2022 annual budget kan City Hall nagaabot na sa Php1.4 bilyon kabale na an narerecibing NTA.


Enot nang sinabi kan consejal sa sesyon regular kan Sangguniang Panlungsod nagparalangkaw an presyo kan produkto nin petrolyo asin seguradong apektado an fondo sa sinambit na produkto. (dpa)