Class/Batch Reunion/Alumni Homecoming

Marhay maraot an magtiripon an mga dating magkaklase sa elementarya asin high school ta idtong dai nagkahirilingn sa halawig na panahon nagkakanoroparan man guiraray.

Kami ngani nagcelebrar kan ika-60ng anibersaryo poon mag-gradwar sa elementarya kan 1962 mala baga ta si mga dai ko lamang nahiling sa laog nin anom na dekada nagkahiriling ko gururang na, an iba mayo nang ngipon, mayo nang buhok, urobanon na, an iba pilay na o naka-wheelchair o walker na.

Pero dakul naman akong dai nagkahiriling ta an iba oto na sa langit o sa imperno o sa purgatory pero dai ta aram. Igwa man mayayaman na o nag-eestar na sa abroad, igwa man dai na nakakabisto ta marhay na an kamugtakan. Igwa man surupog ta tirios.

Pakatapos mi kan Golden Anniversary o 50ng anibersaryo paka-gradwar high school na 3ng aldaw mi pig-celebrar sa Naga maogmahon na marhay.

Iribahan mi pa an mga agom, mga aki asin mga makuapo. Sarong aldaw sa laog kan ekskwelahan, sarong aldaw sa restaurant, sarong aldaw sa sarong dakulang hotel. Mayong contribusyon, si kaya lang ta igwang nag Santa Claus na dolyar an income.

Kaya lang ta an mamondo ta pakatapos kan reunion nagporoon nang malingaw maghangos an iba samuya --- sa abroad, sa Manila o digdi sa Bikol.

Kan medyo hurubin pa kami nag-jojoint-reunion pa an mga kolehiyala asin mga Atenista na magkaparehong batch.

Igwa man taon na an Alumni Homecoming na imbitado an gabos na nagtapos sa eskwelahan an nagastos an mga Silver Jubilarians, an Golden Jubilarians nakatukaw na sana tanganing magbayle, mag-inom asin magkakan.

Kan sarong taon sa reunion kan High School batch 72 sa UNC may binawian nin buhay dahil sa atake de corazon. Inatake daa na nagbabayle asin maogmahon pa pero dai naka-abot na buhay sa ospital.

Heneralmente, an gabos na reunion o tiripon maogmahon.

Ngonyan na taon grabe an preparasyon kan Alumni Homecoming kan Ateneo, Camarines Sur National High School asin BISCAST. Nadadangog ko sa radyo sige na an miriting en preparasyon kan saindang okasyon ngonyan na summer, ngonyan na Setyembre sabay kan Peήafrancia fiesta, ngonyan na Disyembre sabay kan Paskong pagkamundag .

An Sta. Isabel sa Pebrero pa.

Si Mrs. Elsa Manzano- Alba ngani, 86 anyos na class 55 kan dating trade school o BISCAST na ngonyan nagpuli na tangning mag-atendir kan reunion ninda.

An batch 73 kan Ateneo de Naga HS preparado naman, segun ki Rolly Salazar. An batch pinapamayuhan ni Engr. Hermel Fortuno kan Nabua.

Si Bert delos Martirez kan OK FM nag-anunciar man sa saiyang programa sa radyo na an batch 74 kan CamHi ready to fight na. Potluck lang daa pero gulping pagkakan, kanya-kanyang dara pero tipid pa, igwa pang mga sponsors haling America.

Sa CamHi an batch 73 ta 50anyos na ngonyan na taon handa na an gabos. An presidente na si Lt. Alfonso Villamora

(USN ret.) na nagpuli na kan Abril 7 tangarig pangenotan an saindang tiripon sa maabot na Abril 15 sa laog kan CSNHS campus.

An dae ko aram an schedule sa Naga College Foundation ta garo maluya an alumni association kan eskwelahan. Dapat pakusugon yan ni President Mario Villanueva sa tabang ninda directors Rudy Baldemor, Melvin del Puerto, Ben Villanueva asin Mike Padua.

Anyway, sa gabos na iyan Congratulations!!!