top of page

Classroom nahaman sa paagi kan bayanihan

Ni Sonny Malate


San Jose Partido, Camarines Sur --- Nin huli sa espiritu kan bayanihan, sarong concretong classroom na may comfort room an naconstruir asin  nagin kasimbagan sa pangaipo nin dagdag na escuelahan sa Obias-Pugay Elementary School (OPES) sa barangay Pugay sa banwaan na ini.


An classroom may initial na fundong P650,000.00 hale sa local na gobyerno kan San Jose Partido, sa paagi ni Alkalde Jerold B. Peña. 


An PTA kan escuelahan  nag-ambag man nin P39,442.00 hale sa fundo kaini kan school year 2022-2023.


An conceptong bayanihan sa construction kan classroom gikan ki Maria Cynthia C. Primavera, principal kan Obias-Pugay Elementary School (OPES),  asin bilog  man na pigsuportahan ni Dr. Loida N. Nidea, CESO V, dating Schools Division Superintendent kan DepEd Camarines Sur.


Sustenido man an ginibong asistencia ni Alkalde Peña asin Sangguniang Bayan hasta sa  mahaman ini. Bilang pagmidbid asin apreciar kan initiatiba kan principal, an classroom pigpangaranan na Cynthia Primavera Building.


Magigiromdoman na nin huli sa  progresibong kaisipan  kan principal, nakahaman man nin school building na may apat na classroom sa Panicuan Community School, Panicuan, Lagonoy, kan siya nadestino  digdi.


Nahimo man an sarong temporary learning center sa Adiangao Elementary School  asin school  reading hub sa Camagong Elementary School, pareho  sa banwaan kan San Jose, huli sa higos ni Primavera.


An Cynthia Primavera Building sa Obias-Pugay Elementary School nahaman sa paagi kan bayanihan.


Dakulang menos  gastos iyo an libreng labor na pig-extender kan 565th ECB, Philippine Army,  na nakabase sa Camp Wene Martillana, San Jose, Pili, Camarines Sur.


Sa laog nin 45ng aldaw,  an mga personahes kan 565th ECB sa pamamayo ni LTC Margie G. Mingoy, katuwang an PTA kan OPES,  Barangay Council sa pamamayo ni Barangay Capitan Rogelio B. Chavez,  mga fraternity/volunteer groups,  residentes kan barangay asin iba pang stakeholders nagkasararo kan esfuerzos asin higos  sa paghaman kan Cynthia Primavera Building.


Para sa pagkakan durante kan pagpatugdok kan escuelahan, nag-extender nin tabang na bagas asin ibang pangangaipo mismong si Alkalde Peña, Barangay  Council kan  Pugay, School Principal asin faculty kan OPES asin mga matinabang na  individual asin grupo sa comunidad.


Pigtawan doon kan alkalde na nin huli sa espiritu kan  bayanihan, nagkasararo an boot kan comunidad sa paghaman  kan proyekto kan gobyerno. Ini nagin rason  para ini maapreciar asin orug nindang pahalagahan. Nagresulta man ini sa dakulang katipidan sa budget kan local na gobyerno  para sa sarong unit nin classroom.


Ini an nagin dakulang inspirasyon ki Peña na magpaconstruir pang tolong gayong bagong classroom an gobyerno local sa masurunod na taon, sa paagi kan espiritu nin bayanihan. 


Nanotaran kan alkalde na dakulaon na menos sa budget  sa lado kan gobyerno kun an labor cost  magigin gratis sa paagi kan sistemang bayanihan.


Kommentare


bottom of page