Coastal na banwaan sa Camarines Sur candidato bilang ‘‘drug cleared’’

Saro naman na banwaan sa cuarto distrito kan Camarines Sur an candidato nganing ideclara kan Philippine Drug Enforcement Agency (PDEA) asin Department of Interior and Local Government (DILG) bilang ‘‘Drug Cleared Municipality’’.

An municipalidad na ini iyo an Garchitorena, Camarines Sur. Si Police Major Allan Lopez, Jefe de Pulisiya kan Municipal Police Station sa banwaan na ini nagkumfirmar na sa 23 na mga barangay saro nalang an tataposon ninda an misyon nganing ideclara sinda bilang ‘‘Drug Cleared Municipality’’.

Sinabi kan jefe de pulisiya na dakulang bagay an suporta asin kooperasyon kan mga opisyales de barangay, Municipal Police Station, lokal na gobierno asin iba pang ahencias de gobierno para mas epektibo an pagpa-utob kan kampanya laban sa ilegal na droga.

Alagad huli ta igwa pang sarong barangay naglalaom si Major Lopez na an barangay na dai niya ngona pigsambit an ngaran papurogon na an suporta asin paglaban nganing dagos nang drug free an barangay asin bilog na banwaan.

An banwaan nin Caramoan sa pamamayo ni Alcalde Marilyn Co asin an saindang MPS nagrecibe nin onra komo 2022 National Anti-Drug Abuse Council Performance Award sa ginibong programa kan Enero 27, 2023 sa paglansar kan Buhay ay Ingatan, Droga Ayawan (BIDA) sa Camp Simeon Ola, Ciudad nin Legazpi sa pangenot ni DILG Secretary Benjamin Abalos Jr. asin regional director BGen. Rudolph Dimas kan Bicol PNP.

An mga LGUs asin MPSs maging an PDEA asin DILG sa Partido area padagos sa pagtarabangan sa programa laban sa droga nganing maging candidato bilang ‘‘drug cleared municipality’’.

Si Sec Abalos saro sa saiyang prioridad iyo an giyera laban sa droga mala ngani si mga opisyal kan PNP na may ranggo Colonel asin Brig General pinasumiter nin ‘‘courtesy resignation’’ komo pang nasyon na cleansing sa ilegal na actividad na dapat ponan sa organisasyon kan PNP. (dpa)