Comelec balik sa satellite registration sa barangay

Kaipuhan man giraray na igwang koordinasyon an Commission on Election (Comelec) sa opisyales de barangay antes kan saindang pagluwas sa opisina nganing ibuelta an satellite registration sa mga aplicanteng registrant.


Si Abogado Maico Julia Jr. Election Officer kan Ciudad nin Naga asin opisyal na parataram kan Comelec Camarines Sur nagpahayag kaini matapos magpaluwas nin resolusyon an commission na nagmamando sa mga election officer na puede nang ipadagos an satellite registration sa barangay.


An saindang opisina central iyo an nagpaluwas nin desisyon na cancelaron muna an satellite registration duwang bulan na an nakakaagi sa tahaw kan padagos na paglangkaw kan caso sa coronavirus disease alagad dai palang nahahaloy nagpaluwas naman nin resolusyon na binabalik an pagluwas sa mga barangay kan Comelec.


An resolusyon kan commission mantang sa ibang mga rehiyon hababaon pa an nagpapalista sa mga opisina lokal kan Comelec na apektado kan halangkaw na caso kan Covid-19.


An pagbaba sa mga barangay nganing matabangan an mga calificadong votantes na magpalista asin makaparticipar sa maabot na ehersisyo pulitikal sa maabot na pirilian lokal asin nasyonal sa May 2022.


Igwa pang natatadang apat na bulan antes matapos an continuing registration sa Septiembre 30, 2021.


An Camarines Sur piglalaoman na masakat sa labi sa 1.5 milyon an rehistradong votantes kabale na digdi si premirong maboto na nag-eedad nin 18 anyos. (dpa)