Comelec Bicol vs ‘‘No vax, no vote’’

An Commission on Election (Comelec) sa Bicol ibinabasura an rekomendasyon kan ibang opisyal kan gobierno nasyonal na dapat dai tugotan na makalaog sa mga presento kan escuelahan an mga botante na dai bakunado nganing magboto sa mga candidato nasyonal asin lokal sa maabot na eleksyon sa Mayo 9, 2022.

‘‘Constitutional rights’’ an pagboto kan namamanuan nganing magpili kan saindang candidato sa eleksyon, deretso ninda na magpili kun siisay an magpadalagan kan lokal man o gobierno nasyonal.

Ini an panindugan ni Abogado Rafael Olaño, regional director kan Comelec Bicol sa tahaw kan saindang ginigibong preparasyon sa nagdada-ngadang na eleksyon ngunian na taon.

Cada ika-tolong taon nagpipili nin mga candidato lokal asin cada ika-anom na taon sa posisyon nasyonal asin dai dapat hubaan an namamanuan nganing magparticipar sa ehersisyon pulitikal, sabi pa kan Comelec.

Kabale sa pig-aandam kan commission iyo an pagbugtak isolation area sa mga asymptomatic na votantes.

An rekomendasyon na dai tugotan magboto an mga dai bakunado kasunod kan liwat naman na padagos na naglalangkaw na caso kan coronavirus disease yaon pa an huma kan Omicron variant.

Sa campaign period dapat iimplementar an social distancing asin health protocols kan mga tawo na maatendir sa arin man na political rally asin maging pagkampanya sa mga barangay.

Kan Enero 9, 2022 nagsikad na an election period asin saindang binuhay an mga Comelec checkpoint na pinapasunod kan gabos na election officer sa saindang kanya-kanya municipalidad.

Katuyohan kaini, nganing estrictong iimplementar an gun ban na posibleng bitbit kan taohan nin mga pulitiko. (dpa)