Comelec iyo an solusyon sa reforma sa party list - AKB

Nagpapadagos an urulay sa Committee on Constitutional Amendments sa Camara-Baja alagad an tinatawan nin prioridad iyo an pag-enmienda sa economic provision kan 1987 constitution mantang dai kabale sa deliberasyon an propuestong pagtunaw kan party list.


Si Ako Bicol Party List (AKB) Representative Alfredo Garbin, pamayo kan sinambit na komite nagpahayag na dai sinda matukar kan isyu sa politica envez kun igwang propuesto sa reforma sa party list system dapat darahon an caso sa Commission on Election (Comelec).


Si Garbin, Deputy House Speaker iyo an enot na may advocacia sa pagreforma sa party list kan nakaaging pang 15th Congress sagcod na nagpasar sinda kan pag-enmienda sa Acta Republica 7941 o mas midbid sa Party List System Act, alagad an isyu sa administrasyon Duterte na halion si grupo kan mga party list na nagsusuporta sa Communist Party of the Philippines/New People’s Army (CPP/NPA) an solusyon kaini yaon sa Comelec.


Kinakaipuhan sanang magsangat nin disqualification case asin isabay na an proceso na kancelaron an saindang certificate of registration. An remedyong ini yaon sa Acta Republica 7941, sabi pa ni Garbin.


An gobierno kun igwang mga evidencia sa paagi kan ‘‘due process, due hearing’’ sagcod naprubaran an caso an Comelec makancelar kan saindang certificate of registration.


An pag-enmiendahan kan 1987 constitution base sa resolusyon ni House Speaker Lord Alan Velasco na nakatutuk sana sa Article 11, 14, 16 alagad ini iyo an economic provision.


Nagtutubod an Deputy House Speaker na kakayahon nindang matapos an pigtutulod na mga propuesto sa kontitusyon mantang igwa pa sindang oras puon Enero hasta Deciembre 2021.


Mas magiging madali huli ta gigibohon ini sa paagi kan Constituent Assembly (ConAs).


An charter change pigcocontra man ni Bise Presidente Leni Robredo mantang an dapat tawan nin prioridad kan gobierno iyo an problema sa pandemya lalo na an pagbakal suplay kan Covid-19 vaccine envez kan deliberasyon sa cha-cha. (DPAureus)