Comelec Naga nagkukulang miembros kan electoral board

Nagkukulang an mga aplikante na mawot maging electoral board kan Commission on Election (Comelec) sa Ciudad nin Naga para sa nakatalaan na Sangguniang Kabataan (SK) asin Barangay Elections sa Oktubre 30, 2023.

An Ciudad nin Naga dapat makumpleto an 987 chairman, poll clerk, asin miembros kan electoral board alagad sagcod sa ngunian maabot pa sa 300 an kaipuhan kan commission. Sundo na sana sa Agosto 30, 2023 maako nin aplikante nganing pag-andam para sa maabot na sarabay na eleksyon sa SK asin Barangay.

Ini an mga pahayag sa Bicol Mail ni Abogado Maico Julia Jr., election Officer kan ciudad sa tahaw kan saindang padagos na preparasyon para sa sinambit na eleksyon.

Kun mayo nang aplikanteng paratukdo hali sa public schools alagad igwa nin opsyon an Comelec kan ciudad puedeng mag-ako sinda kan mga aplikante hali sa pribadong escuelahan, empleados kan national government asin siisay man na rehistradong botante kan ciudad na mayong relasyon sa arin man na candidato. Sinda iyo an prioridad na maging electoral board members.

Piglinaw ni Julia kan nakaaging eleksyon nasyonal asin lokal kan 2022 an cada precento dapat igwang 1,000 na botantes alagad ngunian na SK asin Barangay Election ginibong 400 botantes cada precento kaya ngani nagkulang si dating mga miembros kan board kan nakaaging eleksyon.

Halangkaw na an saindang honorarium, an chairman marecibe nin P10,000 asin P9,000 sa poll clerk saka miembros kan electoral board.

Sa Calendar of Activities sa Barangay saka SK elections poon sa Agosto 28 hasta Noviembre 29, 2023 epektivo na an gun ban; filling of certificate of candidacy sa Agosto 28 hasta Septiembre 2, 2023; Campaign period – Oct 19-Oct 28 alagad poon sa Septiembre 3 hasta Oktubre 18 bawal pa an pagkampanya asin mantang bawal na pagkampanya asin Liquor ban sa Oktubre 29 hasta Oktubre 30.

An filling kan SOCE sa Noviembre 29, 2023.