COMELEC PREPARADO: Gibohon man sa Dec ‘25 o Nov ‘26 an Brgy, SK elections

Dai apektado an Commission on Election (Comelec) sa desisyon kan gobierno na i-uktaba an Barangay, Sangguniang Kabataan elections alagad igua naman na petisyon sa Corte Suprema na dapat ibasura an pag-uktaba kan nakatalaan na pirilian.

‘‘Mag Deciembre 2025 o Noviembre 2026, preparado an Comelec magpa-eleksyon’’, ini an reaksyon kan Comelec sa paagi ni Abogado Maico Julia Jr., Election Officer kan Ciudad nin Naga kasunod kan pigsangat na ‘’petition for certiorari’’ ni Atty. Macalintal sa Corte Suprema na hinahagad na ideclarang unconstitutional an dai palang nahahaloy na pinirmahan ley ni Presidente Ferdinand Marcos Jr. na nag-uuktaba kan 2025 Brgy asin SK Elections (BSKE).

Sa sinangat na petisyon ni Romulo Macalintal, hinuhurot kaini sa pinakalangkaw na corte na mag-isyu nin Temporary Restraining Order (TRO) nganing idagos an nakatalaan na pirilian sa Deciembre 1, 2025, envez kan Noviembre 2, 2026.

Magigirumduman an election lawyer enot naman nagsangat nin kaparejong petisyon sa SC na i-uktaba an pirilian sa SK asin Brgy elections kan 2023 alagad sa desisyon kan pinakalangkaw na corte kan Hunyo 27, 2023 pig-declarang unconstitutional an ley na nag-uuktaba kan nakatalaan na Barangay asin SK elections kan 2023.

Huli kaini, sinabi pa kan Comelec sinda parating nakaandam kan nakatalaan na pirilian mala ngani natapos na an ginibong voter registration kan Agosto 1 hasta 10, 2025.

Mientras tanto, an ibang mga macandidato nagsabi na sinda nag-aandam mantang nagtutubod na posibleng mangyari man giraray na idagos an eleksyon asin ideclarang unconstitutional an pinirmahan na ley ni Marcos na nag-uuktaba sa Noviembre 2026.