Comelec voters’ registration pigtalaan sa Agosto 1-10

Liwat sinibog kan Commission on Election (Comelec) an voters’ registration envez sa Oktubre 2025 pigtalaan na sa Agosto 1 hasta 10, 2025 para sa gigibohon na Barangay asin Sangguniang Kabataan Elections (BSKE).

Si Atty. Maico Julia Jr. Election Officers kan Ciudad nin Naga nagsabi ini an pinakahuring resolusyon kan Comelec en banc kan saindang opisina sentral nganing makaandam sa BSKE elections sa Deciembre 1, 2025.

Enot nang pigtalaan si voters’ registration kan Hulyo 1 hasta 11, 2025 alagad pigtalaan sa huring semana kan Oktubre alagad sa pinakahuring desisyon kan commission sa maabot nang Agosto 1 hasta 10.

Madagos man o dai an pirilian dapat pirming preparado an ahencia sa tahaw kan pigtutulod kan congreso na isibog sa taon 2026.

An senado igua nang pinasar na bill na i-uktaba an BSKE alagad sagcod ngunian pendiente pa na pighahalat an magiging pinal na desisyon ni Presidente Ferdinand Marcos Jr.

Nangapodan an Comelec na si mga mapalista dapat dai na magpahuring aldaw nganing dai magsuroksokan asin dai magpila kun suarian masara na an opisina.

An mga nag-eedad 15 hasta 17 anyos sa lado kan SK puede nang magpalista saka si nag-eedad na nin 18 anyos pataas.

Piglalaoman ni Julia na maabot sa labing dos mil an mapalista nganing makapartisipar sa BSKE. Kan nakaaging midterm elections an Naga iguang 121,000 na registradong botantes.