Commissioner Ferolina dapat magdemiter sa puesto-BAYAN

Hinuhurot kan Bagong Alyansang Makabayan (BAYAN) sa Bicol na dapat magdemiter na sana si Commissioner Aimee Ferolino kan Commission on Election alagad kaipuhan man mangapudan an mga tawo na suportaran an kahagadan huli ta nakakadamay an bilog na commission na posibleng disganado na an publico sa kribilidad kan Comelec sa pagduda na tinuyong abalahon an desisyon sa disqualification case laban ki presidentiable Bongbong Marcos.

Ini an panindugan kan BAYAN Bicol sa paagi kan saindang lider na si Vince Casilihan kasunod kan pagbuyagyag kan nagretirong Commissioner Rowena Guanzon huli sa posibleng tuyong inaabala an pagpaluwas kan desisyon ni Ferolina bilang designadong ponente kan disqualification case contra ki Marcos.

Bilang ponente si Comelec Commissioner Ferolina dapat malinaw an amay na pagpaluwas nin desisyon kun discalificado o dai si Marcos komo presidential candidate. Kaipuhan maaraman tolos kan mga tawo antes kan campaign period sa mga candidato nasyonal huli kan mga pagduda sa commissioner asin mismo kan nagretiro commissioner dapat mangapudan an mga tawo para sa saiyang pagdemiter sa puesto, sabi pa ni Casilihan.

Ta’no dapat igwa nang desisyon huli ta ‘‘nakasalalay’’ an satong nasyon Filipinas. Kun posibleng tinutuyo an desisyon maduda an publico na nagpapagamit sinda sa politico.

An arog kaining isyu bakong marhay na ladawan sa Filipinas bilang sarong democraticong nasyon.

Ta’no ta kaipuhan kan tawo an amay na desisyon bakong magayon sa nasyon an mga pagduda sagcod na nahahalian nin kridibilidad an commission, sabi pa.

Dapat an saindang desisyon patas sana huli ta kun igwang kinakampihan yaon an mga pagduda na igwang ‘‘under the table na usapan’’, sabi pa kan BAYAN.

Sa lado kan Comelec, si James Jimenez opisyal na parataran kan commission sinabi kaini na dakul sinusurat asin igwa pang ibang prioridad kaya naabala an sinambit na desisyon.

Alagad sa mga nangyayaring ini sa commission puedeng madisganar an mga tawo kun mahahalian sinda nin pagtitiwala sa gobierno.

Si Guanzon antes nagretiro sa serbisyo kan Febrero 2, 2022 asin saro pang commissioner naka-haman na kan saiyang ‘‘vote to disqualify presidential candidate Bongbong Marcos.’’

An reclamo sa Comelec kun tano ta dapat discalificado si Marcos huli kan dai pagbayad nin buwis kan panahon na siya an gobernador sa provincia kan Ilocos Sur asin naprubar sa corte sa caso na nagkasala. (dpa)