Committee on Health nag-apelo sa paglaban sa ‘‘deadly virus’’

An Chairman kan Committee on Health sa Sangguniang Panlungsod kan Ciudad nin Naga nagpagirumdum sa lambang residentes asin opisyales de barangay kan ciudad na maging responsable sa pagsunod sa minimum health and safety protocols nganing maibitaran an pag-ulakit kan Coronavirus disease (Covid-19).


Si Consejal Sonny Rañola nagpahayag an ciudad na ini kabale sa 15 mga banwaan sa Camarines Sur na pigrerecomendar kan Department of Health (DOH) Bicol na ipasa-irarum sa General Community Quarantine (GCQ) na puedeng ma-apektaran an dalagan kan economia asin limitasyon kan mga hiro kan tawo sa tahaw kan padagos na paglangkaw kan caso sa Covid-19.


Sunod-sunod an paglangkaw kan caso na inaabot na nin 30 hasta 37 caso kan nakaaging semana nin huli kaini kaipuhan an cooperasyon kan lambang namamanuan, sabi pa kan consejal.


An Screening Team kan City Hall na pigdestino ni Alcalde Nelson Legacion sa Del Gallego Border sagcod na nagbugtak nin personajes na in-charge sa pagconducir nin antigen test dakulang bagay nganing masara an mga nagpupuroling locally stranded individuals asin kun magpositivo sa virus deretso na sa isolation center.


Posibleng igwang nakakalusot na returning residence hale sa National Capital Region (NCR) na epicenter kan Covid- 19 alagad nag-apelo si Consejal Rañola sa mga residentes kan barangay asin opisyales de barangay na isombong sa local IATF nganing ma-aksyonan.


An pag-monitor kan mga returning residence imporanteng marhay nganing malikayan an paglakop kan virus sa sarong barangay maging sa saindang familia.


Saludo si Rañola sa Liga ng mga Barangay sa Ciudad nin Naga na pinamamayohan ni Consejal Antonio Beltran na nagiging katuwang kan lokal na gobierno nganing ma-enganyar an mga senior citizen asin mga residente kan barangay nganing ipaliwanag kun tano ta kaipuhan magpatudok nin bakuna.


Sa enot na survey kan Barangay Health Workers sa mga barangay kan ciudad an resulta dakul pa an ‘‘undecided’’ sa pagpa-bakuna alagad luway-luway nang na-iintindihan kan comunidad. (DPAureus)