Community pantries bakong maka-CPP/NPA

Warak na sa nagkaperang banwaan sa Camarines Sur asin sa ciudades kan Naga asin Iriga an community pantries asin dai man sinda organisado nganing maging prontera kan Communist Party of the Philippines/New People’s Army (CPP/NPA) envez nagtatabang sana sa pobreng familia ngunian na pandemya alagad pigre-red tagging kan gobierno.


An red tagging ginigibo kan National Task Force to End Local Community Armed Conflict (NTF-ELCAC) na compuesto kan cabinet secretaries, mga opisyal kan militar asin pulis asin ngunian lakop na sa social media an pig-post sa FB.


‘‘Maraot sa buot, dai man planado, nakaka-inspire asin voluntad sana an misyon me asin dakul man an mga nagdodonar nganing itao man sa na-ngangaipo’’


Ini an mga reaksyon ni Da Christopher Aguilar, 33 anyos na nagbugtak nin Tabang Kumunidad sa barangay San Felipe, Ciudad nin Naga na dakul na an nagtatabang asin dakul naman na tios na familia an natatabangan sa laog kan limang aldaw nang pagtugdas kan sadit na proyecto.

Tabang Kumunidad. Si Da Christopher Aguilar (naka-itum na T-shirt) nagtataong dikit na ayuda sa nagpipilang naghahagad nin tabang hale man sa donasyon na binubugtak sa saiyang sadit na lamesa sa barangay San Felipe, Ciudad nin Naga. (DPAureus)


Apat sanang oras an saindang pag-display kan mga produkto cada aldaw.


An mga community pantry lakop na sa ibang rehiyon na nagpuon sa Ciudad nin Quezon sa paagi kan Manginhawa Community Party (MCP) alagad pigre-red tagging kan gobierno na ginagamit kan CPP/NPA.


Sa Pasacao, Camarines Sur nagtugdas man kan Domingo, Abril 18 si Jinky Vinus na napuon ala una hasta alas cinco nin hapon cada aldaw nin Sabado asin Domingo.


Igwa man nag-dodonar alagad sa saindang familia sana dai man sinda nin organisasyon sa iba pang kaparejong tabang kumunidad sa Camarines Sur asin mayo man digdi nin envueltong ibang grupo, sabi pa ni Vinus.


Alagad si Vinus naghihinanakit man sana sa gobierno asin makulog sa buot apesar nakakatabang na ngani sinda asin bako man kalaban kan gobierno pigre-red tagging pa.


An Tabang Kumunidad ni Aguilar nagpuon kan 2016, kan 2017 sa tahaw kan nangyayaring guiera sa Ciudad nin Marawi nagdara sinda nin mga tabang sa evacuees na apektado kan kariribokan.


Afuera pa kaini, nakaabot pa an saindang grupo sa Batangas na nagdara nin ayuda sa mga apektado kan pagtuga kan Volcan Taal.


Sinabi pa ninda Vinus asin Aguilar kun pigmamando na kan Department of Interior and Local Government na magkua sinda nin permit sa LGU iyan saindang gigibohon nganing ipadagos an tabang sa mga apektado kan pandemya.


An MCP temporary nang nagsara kan saindang tabang para sa seguridad kan saindang pag-iriba huli kan ginigibong red tagging kan gobierno.


Sainda man ipapasunod an health protocols sa mga naghahagad nin ayuda ano man na produkto agrikultura asin iba pa.


An ibang mga community pantry yaon sa Baao, San Jose, Calabanga, Libmanan, Pasacao, gabos digdi sa CamSur asin ciudades kan Naga asin Iriga.