Confidential HIV testing libre - DOH

An Department of Health Bicol Center for Health Development (DOH Bicol CHD) nag-eenganyar sa publico na mag-aprubetsar kan libreng confidential Human Immunodeficiency Virus (HIV) testing sa mga hospital kan gobierno asin Rural Health Units (RHUs).

An free confidential HIV testing ginigibo sa Primary Health Care sa RHUs, Municipal Health Offices (MHOs) asin sa mga City Health Offices sa rehiyon Bicol. Afuera kaini, yaon an Bicol Regional Hospital and Medical Center sa Albay asin sa Bicol Medical Center sa Ciudad nin Naga.

Nakatalaan pang magdugang nin mga treatment hubs sa cada provincia kan Kabikolan asin testing services sa RHUs/CHOs, hospitals, mga laboratoryo, asin community based screening.

An advocacia kan DOH tanganing dai na magparalangkaw an caso sa rehiyon na igwa nang tinatamaan na nag-eedad nin 18 hasta 34 anyos.

Sa record digdi sa Bicol Igwa nang 2,400 na caso asin dugang na 27 na naikurit kan Mayo 2023. An Ciudad nin Naga saro sa may halangkaw na caso.

Sinabi pa kan DOH nganing maibitaran an caso dapat magpaseguro maggamit nin condom, dai maggamit nin binabawal na bulong, alcohol mantang an ponto kan ahencia an edukasyon asin early detection laban sa nakakaulakit na helang iyo an dapat tawan prayoridad.