Congratulations 2022!!!

Dios Mabalos asin Congratulations sa kiisay man o sairisay man an nasa likod kan pagtulod kan pangaran ni Kristian S. Cordero bilang saro sa TOYM awardees ngonyan na taon.

Long overdue o dapat kadto pa ini guinibo. Nabisto ko si Kristian sa opisina kan Bicolmail/ Goldprint Printing Press kan nagkapirang taon na an naka-agui. Padangaton siya kan saiyang ina asin mismo kan Bicolmail publisher na si Nilo P. Aureus. Bako lang produkto kundi aki siya kan Bicolmail.

Edukador, produser, director nin pelikula, international na parasurat, makata asin mapinadangat sa mga matataling estudyante lalaki asin babae.

Column pa lang novela na an mga sinurat ni Kristian sa Bicolmail, maglakaw-lakaw ka sa mga coffee shop sa Naga dawa kamatangai pa nin bangui matatagbuan mo si Kristian na sa sarong kanto o nasa guilid, solo-solo nagbabasa o nagsusurat.

An pigmukna niyang Savage Mind na sarong book shop sa Naga pigdadayo bako lang nin mga juvenes o estudyante kundi nin mga paratukdo asin mga professionals asin mga mahihilig sa libro.

Maski an sikat na Bicolano poet duman sa America na si Luis Cabalquinto saro sa mga nangengenot na tagahanga ni Kristian Cordero.

Bilang pag-onra sa sikaton na Bicolano poet in English (maski sa Rawit-dawit Bicolnon), nagbugtak si Kristian nin Cabalquinto Room sa laog kan Savage Mind building. Presente ako asin si Tito Valiente durante kan pagbukas kan Cabalquinto Room. Si Kristian iyo man an director ko sa short film na may titulong “Sagkod” na pig-shooting sa Cathedral, semenario asin Barlin Street kan 2011.

Apuesar na piglansar na ni Archbishop Rolando Tirona an sakong librong “Ini an Totoo” kan Pebrero ngonyan na taon gusto niya pa ilansar otro sa Savage Mind.Dakul na an kopya kan librong nakadisplay ngonyan.

An sakuyang sobrena na si Neri Rose V. Zamora na estudyante niya sa Social Science subject sa Ateneo tinawan niya nin maimbong na pag-aruga.

Dakula na siyang negosyante ngonyan sa Manila asin sa abroad.

An iba pang TOYM awardees kan Bicol iyo sinda Jun Mongoso kan Metropeso asin dating Naga City administrator, si Mayor Jess Robredo sa local governance, si Congressman LRay Villafuerte kan siya saro pang negosyante, si depuntong Gobernador Luis R. Villafuerte Sr. sa linya nin investment banking, si depuntong Monsignor Leornardo Z. Legazpi, dating Arcbishop kan Caceres kan siya rector pa kan University of Santo Tomas, asin Auxillary Bishop kan Manila, ( pero siya sarong Bulakenyo), asin si depuntong Gobernador Jose M. Bulaong MD kan Camarines Sur, sa linya nin Rural Medicine kan siya saro pang columnist kan Bicolmail kan 1968.

An nagsurat kan nomination ni Doktor Bulaong iyo si Francis T. Nacianceno Jr, an pinaka-enot na editor kan Bicolmail.

Segun ki LRV sa interview kaining alang-alang kan siya nabubuhay pa, an sekreto kan sarong TOYM awardees o kan Ramon Magsaysay awardees o kan Nobel Peace Prize awardees iyo an nagsurat kan nomination.

Sairisay daw an masurunod?

Abangan…..

* * *

Congratulations man sa sakong Hermano sa SB na si Loreto Cabaήes alyas TorPedo an bagong editor-in-chief kan Manila Bulletin, siya pa alabis an business editor kan kaparehong mayor na diyaryo national, an pinaka-gurangan na diyaryo sa Pilipinas ngonyan.

Si Lory iyo an pinaka-senior staffer kan Bulletin, 75 na pero dai pa nagreretiro, valedictorian sa high school sa Iriga City, si Cabaήes nagkua nin Agri-Business sa UP, apat na taon sa Los Baήos, 1ng taon sa Diliman. Dahil sa saiyang outstanding academic performance kinua siya kadtong depuntong sekretaryo Arturo Tanco an ama kan Green Revolution asin konsideradong the best agriculture secretary kan Panahon ni Ferdinand Marcos Sr.

Sa UPLB si Cabaήes an team captain kan Sarong Banggui Debating Team kan 1968 Loyalty Day Celebration an mga miyembros iyo si depuntong Doming Discaya Sr. kan Sorsogon asin an saindong lingkod kan Camarines Sur. Dinaraog mi an gabos na fraternities asin sororities sa Campus apuera kan UPLB Honor Society.

Naguiguiromduman ko si Torps Cabaήes iyo an star kan famusong Santos Dormitory. (Dai siya nungka nag-ako kan award na pig-oofrecir kan Iriga City Hall).

* * *

Kulibat ko palan bago magtapos an taon gusto ko paabutan nin dakulang Congratulations an sakuyang amigong intimo asin kataid sa pahinang ini na si Papa Bert Delos Martirez grabe na an pressure sakuya na omawon si Papa Bert bako lang bilang maconsuelong coloumnist sa Bicol kundi bilang broadcaster na may sense of humor na, down to earth pa asin magagayon pa an pinapatugtog na musika.

Humilde, tama an Bicol na pigtataram asin nagdadangog bako lang sa pag-iriba sa laog kan estasyon kundi pati sa mga para-antabay sa radyo, parabasa kan Bicolmail na nag-aapod sa telepono o nagtetext kan saindang reaksyon.

Kan panahon kan Mrs. Bicolandia Beauty Contest an tandem ninda ni depuntong David Dollano asin Bert Delos Martirez iyo an gustong dalanon kan mga para-antabay sa UNC Gym ta dai ninda pigpipirit an saindang pagpangisi pero nakakangisi talaga ( mayong canned laughter o hirikhitik).

Mabuhay, ka Papa Bert.