CONGRESO DAPAT MAGTALAAN SPECIAL SESSION: Excise tax sa petrolyo suspendiron-Bordado

Dapat magkasararo sa congreso na suspendiron ngona an mga ‘‘excise taxes’’ sa mga produktong petrolyo na apektado na an namamanuan kan haros cada semana naglalangkaw an presyo.

Si Congresista Gabby Bordado kan tercer distrito kan Camarines Sur nagpahayag sa Bicol Mail sa tahaw kan nangyayari ngunian na krisis sa produktong petrolyo sa padagos na paglangkaw nin presyo kaipuhan na ngonang suspendiron an mga excise taxes nganing makapugol sa pagparalangkaw kan petrolyo mantang kun magpapadagos an krisis sa Russia asin Ukraine mas lalo malala an problema.


Dai na nauuntok an ‘‘oil price hike’’, na yaon na sa ika-sampolong semana mala ngani sa ibang provincia nagsasakat na sa Php80 an litro kan gasolina.


Kun hehelingon sa Internal Revenue Code, pueding gibohon ini kan gobierno maging iba pang buwis lalo na sa economia nganing mapugolan an pagparalangkaw kan presyo kan sinambit na produkto.


Saiyang sinabi na nagtutubod siya sa mga pahayag ninda Congresista Rufus Rodriguez asin Congresista Joey Salceda na suspendiron na ngona an sinambit na buwis sa mga produktong petrolyo.


Maging sa mga pahayag man ni Congresista Mikee Romero na dapat magtalaan sinda nin special session nganing maghaman nin ley na mapundo sa padagos na paglangkaw kan presyo kan mga petroleum products.


Oras na magkasararo sinda sa congreso dapat suportaran man ni Presidente Rodrigo Duterte na aram niya an kamugtakan kan nasyon na bako lang sektor nin transporte an apektado maging an gabos na namamanuan, sabi pa ni Bordado.


An sektor nin transporte naghahagad na sa Land Transportation Franchising and Regulatory Board (LTFRB) na aprubaran na an saindang hinahagad na dugang na flete, an apektado digdi an pasajeros mantang nagbabalik na kuta sa normal huli ta nagbababa na an caso kan Covid- 19 naribayan man kan problema sa produktong petrolyo.


Sa Ciudad nin Naga, sa entrevista kan BM ki Robert Valiente tsuper nin pampasajerong jeepney sa rutang Centro-Del Rosario nagpahayag na enterong kapa-kapa sinda sa aroaldaw na pagkayod sa halangkaw na presyo kan petrolyo nalulugi na sinda mas marhay nang makapuli man sinda sa familia nin Php300, marhay ngani an saindang operator binabaan man an saindang tinataong bayad sa maghapon na kayod.


Maging man an tsuper nin mga trimobile, sinabi ni Manager Domingo Porlaje kan Pistton Development Cooperative nagsabi na nagkapera nalang na tsuper an nagkakayod sa sainda huli ta nalulugi man sana sa halangkaw na presyo kan gasolina, kulang pa an pasajeros.


Sinabi pa kan lehislador kan tercer distrito kan Camarines Sur dakul na an nagrurulowas na mga residentes bako lang sa National Capital Region maging digdi sa Camarines Sur asin Kabikolan yaon man an karibay sa Covid-19 na halangkaw na presyo kan petrolyo.


Nagtatalubo na an satong economia, nagbabalik na sa trabajo an mga empleados sa pribadong sektor alagad sinasabat man ninda an mga naglalangkaw na presyo kan mga prime commodities huli kan halangkaw na presyo kan peltrolyo. (dpa)