Consejal Albeus masunod na appropriation chairman sa 14th SP

Ipapasunod giraray sa 14th Sangguniang Panlungsod kan Ciudad nin Naga an tradisyon na kun siisay an number one councilor sa resulta kan eleksyon iyo an mapugol kan chairmanship sa Committee on Appropriation.

Si Consejal Jessie R. Albeus, na nakakua nin halangkaw na voto sa pirilian nasyonal saka lokal sa ciudad kan Mayo 9, 2022 iyo na an ciertong masunod na pamayo kan Appropriation Committee na pugol ngunian sa 13th SP Consejal Ghiel ‘‘Oying’’ Rosales na dating nangenotan sa resulta kan eleksyon kan Mayo 2019 sa ciudad sa mga candidatong consejal.

Kinumfirmar ni Albeus sa Bicol Mail na siya na an masunod na pamayo kan sinambit na komite mantang sinabihan na siya ni Rosales ipapasa na niya an kaparejong komite sa masunod na komposisyon kan consejo lokal.

Sinabi pa na mayo naman nagcontra sa ibang miembro kan SP maging si bagong matukaw na elehidong consejal.

Si CPA/Lawyer Consejal Salvador Del Castillo kun tatanawon sa kalipikasyon iyo an dapat tukahan na mag-chairman alagad sinabi kan re-elected councilor dawa kalipikado siya mayo sa plano na ambisyonan an chairmanship kan appropriation committee.

Alagad saiyang piglinaw na mayo man sinda kaini sa internal rules envez nasusunod sana an tradisyon na reglamento cada bagong komposisyon kan SP.

Saiyang sinabi, mas prioridad niya na maging miembro huli ta mas activo siya sa deliberasyon orog na sa pagserne kan mga ordinansa sa appropriation maging sa urulay kan annual budget.

Magigirumduman si Albeus candidatong independiente asin nanggana sa 2019 election na nag-ika sampolong puesto alagad kan mag-ayon sa Team Naga iyo na an topnotcher councilor sa natatapos palang na pirilian. (DPAureus)