top of page

Consejal kan Naga dai mabirik tambod vs STL

Mantenido ni Consejal Vidal Castillo an saiyang panindugan contra sa ano man na porma nin sugal, legal man o ilegal sa Ciudad nin Naga na dapat isikwal kan City Hall an operasyon kan Small Town Lottery-jueteng huli ta ini pinuponan nin maating politica.


Ini an reaksyon kan consejal sa tahaw kan naging desisyon kan Committee on Games and Amusement na pinamamayohan ni Consejal Sonny Rañola kan Sangguniang Panlungsod na ‘‘noted’’ sana si kahagadan kan Emerald and Gaming Corporation kan STL na naghahagad nin resolusyon kan SP nganing tugotan sa operasyon kan sugal na dating jueteng alagad ginibong STL.


An committee dai na nagtaong rekomendasyon sa SP mantang igwa nang enot na pagtugot si Alcalde Nelson Legacion huli ta yaon sa saiya an poder na mag-isyu nin permit.


Dai na ko mabari nin panindugan contra sa STL magin legal o ilegal na sugal, dai ko nagrerecibe nin payola, sabi pa ni Castillo kan makuanan nin entrevista kan Bicol Mail.


Si Consejal Salvador Del Castillo nagpahayag na mayo sindang magiginibo sa dahilan na legal an sinambit na sugal asin igwang franquicia sa PCSO.


Bulan nin Noviembre 2023 mainit an isyu sa pagtugot kan City Hall sa STL kan magpoon an gugo kan sugal kan Noviembre 15, 2023 na may opisina sa Barangay Cararayan alagad sa sesyon regular kan SP, si Consejal Vidal nag-privilege na saiyang kinukundenar an operasyon kan STL- jueteng sa ciudad huli ta an sugal bako sanang apektado an kapobrehan asin jovenes envez saro sa mga dahilan nin maating politica.


Saiyang pigpuntohan an mga panindugan ni nagin alcalde asin DILG Secretary Jesse M. Robredo magin kan Catholic Bishop Conference of the Philippines sa paglaban sa jueteng.


Sa statement na pinaluwas kan CBCP kan 2023, ‘‘declared that for the past 15 years, the Bishops of the Philippines have been denouncing gambling in its various form especially jueteng’’.


The resounding words emphasized that the gambling, whether as jueteng, masiao or any manifestation, is an insidious moral and social cancer, systemically eroding the fabric of our society: An makusog na panindugan na ini kan CBCP nagtatao nin doon sa kararatan na pigdadara satuya kan jueteng asin iba pang pormal nin sugal, sabi pa kan consejal.


Dinagdag pa niya sa turno ni Robredo dai siya nakiulay manonongod sa paglaban sa jueteng, pigsabi kaini na an jueteng iyo an saro mga pigpupunan nin maating politica, Jueteng fuels dirty politics. Poon na magin alcalde kan 1988, si Robredo suportado kan namamanuan nganing labanan an sugal.


コメント


bottom of page