Consumedores dejado kun maglaog an BLPC
An mga halangkaw na opisyal kan Camarines Sur III Electric Cooperative (Casureco III) sa Ciudad nin Iriga nagpahayag na dejado an miembros-consumedores kun dagos nang aprubaran sa Senado an House Bill 4437 nganing matawan franquicia na magbugtak kan kumpanya nin kuryente an Bicol Power and Light Corporation (BLPC) sa Rinconada district.
Pigsumiter na sa senado kan Bicol Electric Cooperative Association (BECA) an saindang resolusyon na pusog na nagcocontra sa house bill sa pighahagad na franquicia kan BLPC sa tahaw kan naging marikas na desisyon ni Senador Grace Poe, Chairman kan Committee on Public Services na aprubaran na an controvercial na bill.
Si Acting General Manager Engr. Wilfredo Bucsit asin Task Force Rinconada Power Chairman Ana Sylvia M. Alsisto nagpahayag sa press conference kan Jueves, Deciembre 2 na kun marealisar an HB 4437 ni 2nd District Congressman LRay Villafuerte kan Camarines Sur magkakaigwang dakulang epekto sa ribo-ribong miembros-consumedores arog kan paglangkaw kan singil sa tarifa sa kuryente; kun may calamidad dai na makakua nin ayuda sa gobierno mantang an gastos sa infrastraktura asin sa operasyon ipapasa sa consumedores na maresulta sa halangkaw na tarifa sa kuryente; asin energization program dai na makakalaog sa hararayong barangay mantang malulugi an kumpanya.
Sa isyu sa halangkaw na tarifa, sinabi ni Board Chairman Alsisto mismo na an Energy Regulatory Commission an nagkumfirmar sa committee hearing na kun igwang malaog na ibang kumpanya nin kuryente sa sarong lugar ciertong malangkaw an tarifa sagcod na magduble.
Sinabi pa na iba an mangyayari sa cooperativa nin electricidad kun may kumpetencia, iba an situasyon sa distribution utilities tinutugotan an natural monopoly huli ta an billing na-determined kan sadit, diit an mabaranga an resulta malangkaw’’.
Si AGM Bucsit nagpahayag man sa isyu sa calamidad, huli ta pribado an BLPC dai puede sindang makakua nin ayuda sa gobierno para sa rehabilitasyon. Bakong arog sa mga cooperativa nin electricidad nasa lindong kan National Electrification Administration marikas an ayuda asin pagtabang sa rehabilitation project.
Sa isyu naman sa energization sa hararayong barangay, sinabi pa ni Bucsit na ciertong dai na makalaog an pribadong kumpanya sa mga barangay na kulang an consumedores mantang an saindang kaisipan iyo an ‘‘income’’ bakong magpalugi.
An grupo nin mga empleados kan Casureco III, sinabi ni Ann Rochi Iraola saindang pusog na pigcocontra asin kinukundenar an propuestong ley mantang nakahawas na ngani sa ‘‘ailing cooperative’’ matapos an apat na taon asin ngunian yaon na sa ‘‘double AA’’ interesado na an pribadong kumpanya na maglaog sa Rinconada district.
CASURECO III PIGSUROG NI SEN. GATCHALIAN
Sinabi ni Senador Sherwin Gatchalian nagpahayag sa miembros kan media sa Ciudad nin Naga na saiyang cucuestionon sa senado an pag-aprubar sa hinahagad na franquicia kan BLPC sa tahaw kan mga pagcontra kan miembros-consumedores sa Casureco III asin an Bicol Electric Cooperative Association.
Saiyang cocontrahon an rekomendasyon ni Senador Grace Poe kan Committee on Public Services nin huli ta premirong mangyayari sa 121 mga cooperativa nin kuryente an magkakaigwa nin competencia na maresulta sa halangkaw na tarifa sa kuryente.
Bako lang sa punto na contra an cooperativa asin BECA alagad adalan an interes kan ma-aapektaran na ribo-ribong consumedores.
Huli kaini, segun sa senador bilang chairman kan Committee on Energy saiyang hahagadon na dapat ibaba giraray sa committee level nganing magpa-apod liwat nin committee hearing sa apektadong cooperativa.