Consumer group sa Mindanao naghahagad nin reforma sa ECs

Saro naman movimiento nin miembros-consumedores kan mga cooperativa nin electricidad (ECs) sa Visayas an nagsurat sa Energy Regulatory Commission (ERC) asin National Electrification Administration (NEA) na naghuhurot nin mga reforma asin labanan an kurapsyon asin tapuson na an ilegal na mga kontribusyon sa party-list groups.

Ini kasunod kan naging recomendasyon kan Presidential Anti-Corruption Commission (PACC) asin desisyon kan Office of the President sa casong grave misconduct asin pagsipa sa puesto ni Presidente Rodrigo Duterte ki NEA Administrator Edgardo Masongsong.

An grupo iyo an No to Excessive Authority Alliance of Dissatisfied Consumer Movement (NEA-ADCOM CUCA, INC) asin ini pinamamayohan ni Erico Bucoy an National Chairperson na naghuhurot na mag-isyu memorandum na nagdederihir nin mga reforma asin contra kurapsyon sa electrification program.

Kabale sa saindang petisyon na mag-isyu nin memorandum na nagsusugo sa gabos na ECs na pundohon na an monthly dues asin pagtao nin financial contributions asin iba pang suporta pinansyal sa pitong party-list groups sa mga minasunod: 1. PHILRECA, APEC, RECOBODA, AKO PADAYON, NAGMEC, ON EC FOUNDATION, asin NCECCO; 2. Magconducir nin audit an NEA asin ERC asin imbestigaran an gabos na ECs sa saindang tinaong konstribusyon sa pitong party-list groups asin saindang participasyon sa partisan political activities; 3. Para sa NEA asin ERC magconducir nin audit and investigation kan fondo kan ECs na pig-invest sa ESCROW na nasa account sa custodia kan PHILRECA; 4. Dapat mag-aksyon an Commission on Election nganing idiscalificar an sinambit na party-list groups; 5. Sangatan nin caso administrativo motu propio an ECs na maprobaran nagbalga sa ley en relasyon sa PACC Case No. MPA-0005-029.

An petisyon na ini kan NEA-ADCOM CUCA, Inc. kasunod kan casong grave misconduct na sinangat ninda Casureco I General Manager Ana Sylvia Alsisto asin CENECO Board President Roy Cordova sa dating NEA administrator.

Sinabi ni Bucoy na an saindang grupo saludo sa naging aksyon kan PACC asin Office of the President laban ki Masongsong na hinaklas sa NEA kan Agosto 20, 2021.

Dai palang nahahaloy huli kan desisyon kan Malacañan contra ki Masongsong an National Association of Electricity Consumers for Reform (NASECORE) naghuhurot na ipasa irarum sa preventive suspension an mga general manager asin directors kan ECs na nagtaong ilegal na campaign contributions sa PHILRECA. (dpa)