Container van dugang na facilidad sa Covid-19

Tolong provincia sa Bikol na kabale sa naglalangkaw an caso kan coronavirus disease (Covid-19) nagpaseguro kan saindang dugang na facilidad sa virus magamit na kan mga container van na madaling ipatindog.

Si Tommy Lee, Executive Officer kan Office of the Presidential Adviser for Bicol Affairs (OPABA) nagpahayag sa Bicol Mail na nakakua sinda nin 36 na container van na babarangaon kan Albay, Camarines Norte asin Camarines Sur.

An lambang provincia pig-suplayan kaini nin dose (12) mantang an Albay, Camarines Norte asin Camarines Sur base sa datus kan Department of Health (DOH) naglalangkaw an caso kan Covid-19.

Digdi sa Camarines Sur, segun ki Lee pigdara na sa Banasi, Bula, Camarines Sur harani man sana sa Provincial Health Center kan Capitolyo na pinapadalagan kan gobierno provincial mantang sa Camarines Norte asin Albay sainda man ipapatindog harani sa dati naman nindang Covid- 19 facility.

An dugang na facilidad makakatabang kun an sarong provincia napapano na an saindang hospital kan pasyente sa virus, sabi pa ni Lee.

An container van pinasuble kan Department of Public Works and Highways (DPWH) Bicol na dating ginagamit kan saindang mga personajes sa mga field offices.

Naging posible an dugang na Covid-19 facilities huli sa pagtarabangan kan Office of the Presidential for Bicol Affairs, DPWH asin Presidential Anti-Corruption Commission (PACC).

An ibang mga classroom kan escuelas publica iyo an ginagamit kan mga local na gobierno bilang isolation center kan mga pigdududahan na may bitbit ni virus particularmente si mga returning residence hale sa Metro Manila na epicenter kan Covid-19.

Alagad nagtutugot na sa ngunian an gobierno na si may mga sintomas sa virus puedeng magpa-cuarintina sa saindang sadiring residencia. (dpa)