Content creator sa social media iguang responsibilidad sa sociodad

Ni Sonny Malate

Nagpoon si David Con Monserate Rivero sa pagigin content creator sa social media kan taon 2018 pa. Ngonian nasa labing 161,000 na an saiyang followers.

Si Rivero sarong de calibreng media artist, talentado sa lado nin visual artistry, digital technology asin kabatiran sa comunicasyon dalan tanganing makacrear siya nin tampok na contents sa iba-ibang platform.

Si Rivero iyo an nasa likod kan  famosong "Let's Go, Partido", sarong entertainment page na naglalaman nin mga makawiliwili, makolor asin interesanteng tampok  dapit sa tourism destinations asin masisiram na kakanon sa Kabikolan 

Apwera kaini, laman  man digdi an mga  actividades pangcultura, arte asin advocacia dapit sa kapalibotan, entrepreneurship saka mga pambihirang personalidad sa iba-ibang sector asin profesion. 

Huli sa "Let's Go, Partido" nadeskubre, nabisto asin naghatak nin rinibong  mga turista bako sana digdi kundi patin ibang parte kan provincia. Sa sarong lado, masasabi na saro ini sa nakacontribuer sa pagbukas kan kagayonan kan Partido sa bilog na kinaban.

Segun ki Rivero durante kan kinainiti kan saiyang passion sa paggigin content creator, mga  hararayong dagat, Isla, bukid, water falls, salog asin ibang tourst destination an saiyang naabot sa paagi kan saiyang single na  motor asin determinasyon na ipahiling an kagayonan kan lugar sa kinaban.

Huli sa marikas, mahiwas asin mas madaling pagbalangibog sa social media, nagin famoso an content creator. Magpoon kan 2023  nakarecebi na siya nin monetization.  Dagdag pa digdi an mga token na minsan pigtatao saiya bilang paconsuelo kan pig-endorso niyang mga producto, lugar o negocio.

Sa tahaw kan mga positibo asin nakakaengganyong popularidad asin financial saka material na beneficiong dulot sa saiya, kan taon 2022 nag-abot an situation na gusto na niyang mag-ontok sa pagigin content creator.

Base sa saiyang  personal na experiencia minaabot palan  sa puntong minaluya an interes, enerhiya asin entusiasmo kan sarong artist  sa saiyang passion huli sa mga personal na rason o circumstancia.

Sa tahaw kan namateng pagbaba kan saiyang moral, pinili ni Rivero na ipadagos an napoonan na passion mantang namate asin nagtutubod siya na igua siyang responsibilidad social na maninigong  susteniran para ipadagos an ano man na karahayan na nadara niya sa sociodad.

Parte kan responsibilidad na ini, nagin personal na policia njya an dae.paggamit nin raway, pagigin malikay dapit sa mga gender, pampolitica, kapalibotan asin pangnegosyong  isyu.

Katakod kaini nagpaabot siyang mensahe sa mga datihan asin bagohan na mga vloggers na isikwal an pag-endorso sa on-line na sugal. Pig-encaminar niya man sinda na magin mensahero nin paglaom, marhay na virtud asin positibong pananaw sa buhay 

Apwera sa hilig sa social media, actibo man si Rivero sa advocacia sa malinig na kapalibotan asin pagbusol kan derechos asin pakinabang kan LGBTQI+ A community sa sociodad.

Sa presente, siya an Presidente kan Partido Artists Group. Conectado siya sa DepEd, nagin recipiente kan Outstanding Non-Teaching Personnel Award gikan sa DepEd CamSur.