Converge – Ano Man Ta Arog Kayan?



Sa gabos na editoryal kan Bikol Mail na nabasa ko ngunyan na taon, saro sa mga nagustohan ko iyo an editoryal kan nakaaging semana na an titulo, “Walk the Talk.”


Sinabi sa editoryal na nagdadakul an nagrereklamo sa internet saka cable television providers dara kan kapalpakan kan serbisyo.


Sigun sa editoryal, “Unless more drastic legal steps are adopted, it is feared that assurances of improved services will remain nothing but hot air.”


Saro ako sa may reklamo sa sarong TV provider na pinangaranan sa editoryal na dapat “must be subjected to disciplinary action.” An TV provider na ini mayong iba kundi an Converge, na sa pagkakaaram ko an dating pangaran Caceres Cable TV.


Kan Oktubre 26 abot Nobyembre 6, 2020, nagkaigwa nin makusugon na bagyo na nag-agi sa Kabikolan. Dai nakaligtas an Camarines Sur sa bagyong pinangaranang Rolly na an klasipikasyon Category 5. Talagang makusog si duros saka uran sigun sa mga nabasa ko saka estorya kan sakuyang mga tugang asin kapipinsanan.


Turumba an mga poste kan kuryente, lakop an power outages, asin baragsak an mga transmission lines.


Dai pa ngani nakaka-recover an mga tawo, uminagi na naman an bagyong si Ulysses kan ikaduwang semana kan Nobyembre 2020 na klasipikadong Category 4.


An harong mi sa Canaman dai nakaligtas sa kalamidad. Sa laog nin nagkakapirang aldaw mayong kuryente. Mayong marhay na linya an telepono asin mayong TV enterong bulan nin Nobyembre 2020 abot Pebrero 2021.


Sa kasuyaan ko, pina-diskonek ko na lang si telepono sa harong ta pirang semana na mayong linya sige pa an singil kan Bayantel.


Alagad dai ko pinadiskonek si TV sa paghuna ko na mabalik tulos an serbisyo. Sa totoo lang, maski na ngani mayong cable television kan enterong bulan nin Nobyembre 2020, nagbayad pa man giraray kami bilang suporta sa kumpanya maski mayong serbisyo.


Pero ini an makunswelo. Maski mayo pang cable television kan Disyembre 2020 abot Pebrero 2021 sige pa giraray an singil kan Converge.


Nagduman an pinsan ko sa opisina kan Caceres/Converge, siguro mga tolo o apat na beses nganing ipadiskonek na an TV, pero dai man lang inentertain o kinaolay.


An sabi sa iya kan security guard mag-drop nin note o surat sa sarong drop box sa opisina ta may may makontak sa pinsan ko. Sinunod nya si suhestyon kan security guard. Mala sagkud ngunian mayo man nag-apud o nagkontak sa iya. Ay buhay.


Mientras-tanto, sige an singil kan Converge.


Ini an hapot ko: Ano ta inoobliga kaming mga kustomers na magbayad sa mga bulan na mayo man nagluluwas sa television kundi anas linyang nagbabara-barayle o karamul na sound?


Komo kinokonsidera ko an sadiri ko na marhay na kustomer na pirming on-time magbayad sa laog kan mga nakaaging sobrang limang taon, handa man akong magbayad poon sa bulan na marhay na an serbisyo.


Pero duman sa tolong bulan na mayong serbisyo an Converge, dai tama o unfair na obligaron an mga kustomers na magbayad. Sana magtao man nin konsiderasyon an manijamiento o management kan Converge lalo na ngunian na deficil an buhay dara kan pandemya.


Sain ka nakahiling na sinisingil an sarong kustomer na magbayad sa sarong produkto na dai man itinao o inenjoy kan kustomer? Garo ka kayan nagbakal nin mayu.


Sa mga internet companies asin cable television providers na dai kinokonsidera an interes kan mga kustomers asin mayong kalidad an serbisyo sa mga namamanwaan, tama lang an komentaryo editoryal kan Bikol Mail kun sain mayong takot kaining sinabi: “National Telecommunications Commission (NTC) should take assertive action against the erring telecommunication entities.”