Coop nin productong calamansi sa Partido area tolong taon na

Ni Sonny Malate

LAGONOY, Camarines Sur --- Ngonian na  Septiembre 2024 nasa ika-tolong taon na kan pag-operar an Lagonoy Calamansi Farmers Agri-Cooperative, Inc. (LACAFA). An cooperativa iyo an solamenteng grupo nin paratanom nin lemonsito sa Bicol na invuelto sa pigproceso nin  producto gikan sa tinanom na ini.

An LACAFA iguang 63 na miembros na  iguang total na 103 hectarias na pananom na lemonsito sa nagkakapirang barangay sa banwaan na ini. 

May total asset ini na kulang-kulang sa Php10M asin clasificadong medium cooperative kan Cooperative Development Authority (CDA).

Nagpahayag nin dakulang pasasalamat si Nelson Ramos, Manager kan cooperativa, ta mayong nag-abot na makusog na bagyo o ibang calamidad sa Bicol kan mga uminagin taon. Nagin contribuente ini sa madalahay na operasyon kan CALAFA.

Pigbuyagyag man ni Ramos na sa tabang ni Architect Giovanni Per, Chair kan cooperativa, padagos nindang pigtututokan an pag-encaminar sa mga miembros para sa saindang activong participasyon sa actividades kan coooerativa. Siring man, an dapit sa marketing concern kaini tanganing orug pang magin mabaskog an ingreso financial kan grupo..

An LACAFA iguang tolong mga mayor na productong gikan sa calamansi na mababakal sa mga mercado sa pagtaraid na mga localidad kan Lagonoy. An Department of Agriculture Regional Office V  an padagos na nagduduhol nin financial asin technical assistance digdi.

Sarong unit nin close delivery van an nahimo kan cooperative hale sa financial assistance kan departamento de agricultura. An aheñciang ini an nagrelease man nin 40ng ribong calamansi seedlings para sa taon 2023 asin 2024  para sa mga miembros.

An LACAFA iguang water refilling facility sa processing building kaini na gamit sa pagproceso kan saindang producto. Ini an nagigin burabod man nin dagdag na palaog na income orug na sa bulan na mayo nin production kan calamansi processed products.

Segun sa manager, an LACAFA padagos na naggigibo nin mga pag-adal asin pakikipagtransaction sa ibang mga negociantes bako sana sa laog kan rehiyon Bicol kundi magin sa ibang rona tanganing orug pang maggantad an income-generating capacity asin service ehancement kaini.

Sa presente, an cooperativa naggibo na kan initial na mga lakdang sa pagguno nin kaaraman sa pagpapabunga kan lemonsito sa bilog na taon tanganing bilog na taon na man an saindang pagproducir kan calamansi products. 

Segun pa man ki Ramos, an cooperativa an luwayluway na nag-eestudio  kan posibilidad na mag-exportar kan saindang producto sa mga masunod na taon.

Kan Marso 2024,  an LACAFA  pigduholan nin Plaque of Recognition kan Partido State University (ParSU) durante kan ika-23 na charter anniversary kaini huli sa pambihrang contribution kaini sa research asin extension engagements kan universidad.

Calamansi Processing Building kan Lagonoy Calamansi Farmers Agri-Coop. (Photo- Bicol Mail)