Cooperatiba mapabakal nin pigprocesong lemonsito
LAGONOY, Camarines Sur. Madali nang ibenta sa mga grocery, supermarkets asin mga outlets an mga pigprocesong productong gikan sa lemonsito kan Lagonoy Calamansi Farmers Agricultural Cooperative (LACAFA Agri-Coop.)
Nagin marhay asin matriumpo an ginibong serye nin pagtesting kan calamansi concentrate, ready to drink juice asin puree, dalan tanganing poonan na an commercial production kaini sa laog kan bulan na Noviembre.
Sinabi ni Mr. Nelson Roy A. Ramos, General Manager kan cooperatiba, na oras na macomple na ninda an mga papeles sa Department of Trade and Industry (DTI) asin ibang ahencias kan govierno mapoon na sinda sa pagpabakal kan saindang mga productos sa mercado.
An Department of Science and Technology (DOST) Rehiyon 5 iyo an nagtukdo sa mga miembros kan cooperatiba sa tamang pagproceso kan productong hale sa lemonsito.
An Department of Agriculture Regional Office 5 nag-extender nin grant na maabot sa P6.42M sa cooperatiba.
An P4M kaini ipinatugdok kan edificiong gamit sa pagproceso kan productong gikan sa lemonsito asin bilang oficina kan cooperatiba.
An P2.42M ibinakal man nin mga modernong equipajes para sa pagproceso kan calamansi products.
Un milyon pisos man na grant an pigduhol sa kan Angat Buhay Foundation ni dating Bise Presidente Leni G. Robredo. Ini ginamit bilang operational cost kan grupo.
Initialmente, an mga producto ibebenta nguna sa laog kan provincia. Tanganing madagdagan an production asin mapahalangkaw an ingreso, an LACAFA Agri-Coop madistribuer kan saindang producto sa luwas kan rehiyon Bicol sa maabot na mga bulan.
Naglalaom si Ramos asin pag-iriba na an proyektong pangkabuhayan na ini madarang kadagdagan sa hanapbuhay, mapararom kan servicio kan grupo sa comunidad asin mapahiwas kan potential kan lemonsito bilang sarong bastanteng producto sa Lagonoy asin pagtaraid na banwaan.
Mga miembros kan LACAFA Agri-Coop nagtetesting kan pagproceso kan mga producto gikan sa lemoncito. (Photo CTTO)