COOPERATIVA NIN ELECTRICIDAD: Implementasyon sa Lifeline Rate paaagihon sa information drive-ERC
An onseng cooperativa nin electricidad sa Kabikolan pigmamandohan kan Energy Regulatory Commission (ERC) na dapat maglansar kan saindang information drive nganing pasikadon na an implementasyon kan Acta Republica 11552 na mas midbid sa ‘‘An Act Extending and Enhancing the implementation of Lifetime Rate, Amending for the purpose, Section 73 of RA 9136, otherwise known as the EPIRA of 2001’’. An ley nagtataong 5 hasta 35 por cientong diskuwento sa miembros kan 4Ps alagad depende sa consumo sa kuryente.
Narecibe na kan gabos na cooperative nin electricidad sa Bicol an memorandum circular hale sa opisina ni ERC Chairman Monaliza Demalanta kan huring semana kan Marso 2023 na nagmamando sa mga cooperativa na kaipuhan an massive information drive nganing si mga calificadong miembros-consumedores magproceso na kan saindang documentos.
Base sa RA 11552, kabali sa calificado iyo an Pantawid Pamilyang Pilipino Program (4Ps) beneficiaries na magkakaigwa sinda nin dugang na biyaya na subsidiya sa bulanan na consumo sa kuryente alagad bako hali sa fondo kan gobierno envez sa miembros-consumedores na nagcoconsumo nin sobra sa 40 kilowatts per hour.
An information drive puedeng paagihon sa estasyones nin radyo, periodico lokal sa sarong provincia maging sa mga asembliya.
An ley dagdag sa dati nang consumedores na nagcoconsumo nin kulang sa 40 KW cada bulan.
Igwang pigtalaan na bracket sa 4Ps nganing maka-aprubetsar nin diskuwento dapat nag-coconsomo nin 0 hasta 40 KW cada bulan sa electric bill. An diskuwento poon sa 5 hasta 35 por cientong asin depende sa electric bill, sabi pa.
An dating Lifeliner asin 4Ps beneficiaries nganing maging calificado sa tinataong diskuwento kaipuhan magsumiter kan saindang certificate hale sa DSWD, barangay certificate hale sa barangay asin kadakul pang mga documentary requirement na kukumpletohon alagad dai tolos ma-aaprubaran mantang dapat ma-evaluar ngona an saindang sarong taon na consumo.
An forma sa aplikasyon makukua sa mga opisina kan mga cooperativa. (dpa)