COP kan Bato dai na pinatawad kan Bicol PNP

Bato, Catanduanes --- Daing patawad, naging marikas an aksyon kan Camp Semion Ola kan PNP sa Ciudad nin Legazpi nganing ribayan tolos bilang jefe de pulisiya kan Bato Municipal Police Station si P/Capt. Ariel Buraga.


Si Alcalde Juan Rodulfo nagpahayag sa Bicol Mail sa paagi nin telepono na pigdesignar kan police regional office si P/Lt. Fidel Romero bilang officer-in-charge puon kan Deciembre 22 kasunod kan saiyang kahagadan ki Catanduanes Provincial Director Col. Brian del Castillo na sipaon na sa saindang Municipal Police Station si P/Capt. Buraga huli sa isyu sa mga negativong komento kaini sa saiyang Facebook Account contra sa mag-ina sa Paniqui, Tarlac na pinagbabadil gadan ni P/MSergeant Jonel Nuezca.


An PNP sakop kan ‘‘ethical standard’’ asin sarong leksyon ini sa arin man na opisyal kan PNP, segun sa Bicol PNP.


Pasalamat an jefe ejecutivo kan Bato sa marikas na aksyon kan PNP higher command sa Bicol huli ta padagos na inuuran nin komento kan publico an nagpasaway na jefe de pulisiya sa FB Account, kaya ngani nagkulpa na an isyu contra sa Bato Police Station.


An desisyon kan alcalde dai na pigconsulta sa mga opisyales lokal kan LGU Bato maging dai siya nag-apod sa COP.


Tolos siyang nagsurat sa Provincial Director kan Catanduanes nganing ribayan na nagpaluwas man tolos nin relieved order.

Mawot kutang halaton kan alcalde na mag-post sa FB si Buraga nganing kondenaron an pang-gagadan alagad dai ginibo.


Nagpaliwanag sa saiyang opisina an hinaling jefe de pulisiya na bako man intensyon ratakan an mag-inang Sonya asin Frank Anthony Gregorio alagad dai man siya uyon digdi kaya dapat lang ma-relieved sa Bato MPS. (DPA)