Covid-19 case sa Bicol nagbababa

Nagbaba na sa cuatro por ciento an utilization rate kan Non-ICU beds sa Covid-19 kan mga hospital sa Bicol, sabi kan Departamento de Salud.

Kinumfirmar kan DOH Bicol sa pamamayo ni Director Dr. Ernie Vera an padagos na paghuros kan Covid-19 healthcare utilization rate base sa pinakahuring listahan ngunian na semana.

Sa ngunian hale sa 657 na pig-andam na kama, solamente 26 nalang kaini an padagos pang ukopado mantang tolo na sana sa 64 nasa ICU beds an padagos na ginagamit kaparejas kan cinco por ciento utilization rate.

Kontrolado na kan ahencia an naikurit na caso kan Covid-19 sa evacuation sa Albay matapos ilaog sa isolation center si pigtutubodan na kaibahan kan tinamaan kan virus.

Dinagdag pa kan DOH kan nakaaging Hunyo 25, naikurit kan ahencia an panibagong tolong caso sa rehiyon asin sa ngunian igwa na sanang 1,550 activong caso.

Alagad an ahencia nagpatanid sa publico na ugalion an perming paggamit nin alcohol asin paghugas nin kamot asin iba pa nganing makalikay sa delicadong helang.

Hinuhurot na kan DOH national office na ibasura na an public health emergency mantang nagparababa na an mga caso sa virus asin dai na dapat ma-alarma an publico.

Kan panahon ni Presidente Rodrigo Duterte nagdeclara nin presidential proclamation 92 para sa health emergency alagad maninigo nang ibaba kan Malacañan.