top of page

CPP dai nakapalag sa ika-54 anibersaryo, sabi

Apesar kan directiva kan Communist Party of the Philippines (CPP) na maglansar nin pag-atake kontra sa gobierno kasunod kan pagkaka-gadan kan saindang lider Jose Maria Sison, alagad dai man nakapalag an homa kan mga rebeldeng New People’s Army sa pagsabat kan ika-54 anibersaryo kan CPP kan Deciembre 26, 2022 maging sa selebrasyon kan Pasko asin Bagong Taon naging matuninong an rehiyon Bicol.


Si Lt. Col. Marilou Calubaquib, opisyal na parataram kan Camp Simeon Ola, Ciudad nin Legazpi na heneralmente naging matrangkilo an Kabikolan mantang nasa ‘‘high alert’’ an PNP asin man an Philippine Army.


Kun igwa man mga insidente iyo an naputokan nin mga rebentador sa panahon kan Pasko asin pagsabat kan Bagong Taon. Naikurit kan Departamento de Salud walo an biktima na kadakli kan mga biktima hali sa Camarines Sur.


Nagwarak nin miembros kan PNP sa mga simbahan, establisimiento de negosyo, puerto, airepuerto asin sa iba pang mga matahong lugar.


Sa selebrasyon kan ika-54 aniversaryo kan CPP dai man nakahiro an mga rebeldeng NPA alagad kun igwa man actividad napag-araman sa inpormasyon agang amay kan Deciembre 26 nagkaigwa nin ‘‘21-gun salute’’ bilang pagsaludo ki Joma Sison, kagpundar asin pamayo kan Communist Party of the Philippines Central Committee.


Nagpadagos kan saindang aniversaryo dawa na nagpaaram na an saindang lider.


Afuera pa kaini, nagdeclara nin ‘‘10-day mourning period’’ para sa founder Ka Joma Sison.


Siya binawian nin buhay kan Deciembre 16, 2022 mientras naka-exile sa nasyon kan the Netherlands.


An Philippine Army nagpahayag na nagluluya na an fuersa kan mga rebelde sa tahaw kan sunod-sunod na pagsuko sa gobierno sa dahilan na mayong mangyayari sa saindang futuro kun padagos na magiging rebelde.


An simbag man kan NDF perang taon nang propaganda kan militar na pawara na an CPP alagad yaon pa sinda asin padagos na aktibo.

Deciembre 26, 2022 ika-54 anibersaryo kan CPP/NPA nagkakaigwa kan saindang ‘’21-gun salute’’ komo pagrumdom sa mga naginibohan kan saindang lider na si Joma Sison na binawian nin buhay kan Deciembre 16, 2022. (Baretang Bikolnon Online)


コメント


bottom of page